Dy të rinj janë arrestuar në Kukës pasi në mjetin tip Mercedes Benz me të cilin ata lëviznin janë gjetur dhe sekuestruar 1 kallashnikov, 3 karikatorë, 81 fishekë dhe 350 gramë lëndë narkotike kanabis.
Si rezultat i operacionit të koduar “Eagle” u arrestuan në flagrancë shtetasit A. E., 24 vjeç dhe M. M., 33 vjeç, banues në Kukës.
Shërbimet e Policisë kanë ndaluar mjetin tip “Benz”, me drejtues shtetasin A. E dhe gjatë kontrollit të ushtruar në mjetin e tij, gjetën një armë zjarri tip kallashnikov, 3 karikator, 81 fishekë dhe 350 gramë lëndë narkotike kanabis.Nga hetimet ka rezultuar se shtetasi A. E. ia ka blerë lëndën narkotike shtetasit M. M.
Në vijim të operacionit, shërbimet e Policisë kanë ushtruar kontroll në banesën e shtetasit M. M., në fshatin Gabrice, ku kanë gjetur dhe sekuestruar një armë zjarri pushkë, 19 fishekë, 525 gr. lëndë të dyshuar cannabis sativa, si dhe një sasi parash.
Në bashkëpunim me Prokurorinë vijon puna për dokumentimin e plotë të kësaj ngjarjeje. Materialet i kaluan Prokurorisë pranë Gjykatës së Shkallës së Parë Kukës, për veprat penale “Armëmbajtja pa leje” dhe “Prodhimi dhe shitja e narkotikëve”.
