Pas arrestimit të Arben Çukos për korrupsion në Burgje, pasditen e sotme është arrestuar edhe një tjetër ish-deputet i Partisë Socialiste, Arben Ndoka.
Ai është prangosur nga RENEA pasditen e sotme së bashku me dy persona të tjerë me akuzën e ndikimit në tjetërsimin të pronave në qarkun e Lezhës.
Ndoka së bashku me disa zyrtarë të tjerë në Lezhë kanë ndikuar në tjetërsimin e pronave shtetërore te “Rana e Hedhun” dhe në Kune te të afërmit e tij.
Por si është zbuluar Ndoka? Gjatë përgjimeve të një grupi kriminal ka dalë emri i Ndokës, i cili më pas është vendosur në përgjim duke zbuluar aferën që solli më pas arrestimin e tij nga policia pas urdhrit të prokurorisë. Ish-deputeti ishte në përgjim prej disa muajsh për këtë çështje.
Për skandalin e pronave në Lezhë janë arrestuar disa persona në vitin e fundit, mes tyre ish-kryebashkiaku Fran Frrokaj. Në shtator të vitit 2015, Ndoka dorëzoi mandatin e deputetit, pasi u prek nga ligji i dekriminalizimit, pasi kishte një dënim në Itali.
