Arrestimi i ish-deputetit të PS, Alqi Bllako ka bërë edhe jehonë në mediat e huaja, të cilat kanë pasqyruar lajmin. Euroactiv në shkrimin me titullin “Arrestohet përfundimisht deputeti shqiptar në skandalin e qeverisë” argumenton se Alqi Bllako u arrestua si i përfshirë në aferën e inceneratorëve, një skandal qeveritar me 430 mln euro.
“Akuzat kanë të bëjnë me kohën e tij si sekretar i përgjithshëm i Ministrisë së Mjedisit, kur dyshohet se ka bashkëpunuar me ish-ministrin Lefter Koka, gjithashtu i arrestuar, për përvetësim parash”, thuhet në lajmin e Euroactiv, e cila shton se “ai besohet se ka përvetësuar 120 mijë euro si pjesë e një skeme prej 430 milionë eurosh”.
Ndërkohë një tjetër media ndërkombëtare, Abc thotë se “Policia shqiptare ka arrestuar një deputet të Partisë Socialiste në pushtet me akuzat për korrupsion dhe shpërdorim të pushtetit për një projekt për menaxhimin e mbetjeve, një ditë pasi 9 zyrtarë të tjerë të emëruar nga qeveria u arrestuan për akuza të ngjashme”.
Më tej në shkrim thuhet se “Policia tha se akuzat ndaj Alqi Bllakos rrjedhin nga një kontratë koncesioni për një incenerator mbetjesh në qytetin e Fierit, 120 kilometra në jugperëndim të kryeqytetit Tiranë.
Marrëveshja dyshohet se shkaktoi një humbje prej rreth 1.5 milion Euro. Bllako akuzohet për falsifikim dokumentacioni dhe marrje ryshfeti”.
