Pas një hetimi të gjatë, në lidhje me procedurat e tenderimit në Ministrinë e Drejtësisë gjatë periudhës 2016-2017, Prokuroria e Tiranës ka nxjerre fletarreste për disa funksionarë dhe ish-funksionarë të këtij institucioni.
Hetimet ndaj 12 personave kanë të bëjnë me 5 procedura tenderimi, ndërsa dyshimet janë për veprën penale të “shpërdorimit të detyrës” dhe atë të “shkeljes së barazisë së pjesëmarrjes në tendera”.
“Prokuroria e Rrethit Gjyqësor Tiranë në funksion të hetimeve të kryera për procedurat e tenderimit në Ministrinë e Drejtësisë për periudhën kohore 2016-2017, ka marrë në hetim 12 persona të dyshuar për veprat penale të Shpërdorimit të detyrës, parashikuar nga neni 248 i Kodit Penal dhe Shkelje e barazisë së pjesmarrësve në tendera, parashikuar nga neni 258 i Kodit Penal”, thuhet ne njoftimin e Prokurorisë.
Në pranga kanë përfunduar 4 persona, mes të cilëve edhe ish-sekretarja e Përgjithshme në Ministrinë e Drejtësisë, Juliana Hoxha, por edhe ish-drejtori i Shërbimeve Mbështetëse, si dhe specialistë të IT-së. Për të tjerët janë dhënë masa më të buta, si dhe “arrest shtëpie”.
Ka qenë grupi i inspektimit i Ministrisë së Drejtësisë, e më pas ai i Ministrisë së Financave, që kanë evidentuar shkeljet me pasoja të rënda për buxhetin e shtetit.
Tenderat, për të cilat janë marrë nën hetim 12 persona, kapnin vlerën e disa milionë eurove, ndërsa po verifikohen edhe veprimet dhe përgjegjësia konkrete e ish-ministrit të Drejtësisë, Ylli Manjani, por edhe ish-ministrit Petrit Vasili, pasi po hetohet pikërisht periudha kur institucioni drejtohej prej tyre.
Shkeljet më të rënda janë raportuar në lidhje me shërbimin e kamerave në burgje, ndërsa ka dyshime se edhe regjistri noterial nuk funksiononte.
Mesohet se hetimet janë shtrirë ne 5 tendera:
Mirëmbajtja dhe mbikëqyrja e sistemit ICMIS në 7 Gjykatat Administrative;
Përmirësimi i sistemit të mbikëqyrjes elektronike në fushën penale;
Përmirësimi, Zhvillimi dhe Mirëmbajtja e Regjistrit Noterial Shqiptar;
Sistemi i Monitorimit me kamera për burgun e Lezhës dhe Fushë Krujës;
Përmirësimi dhe mirëmbajtja e sistemit elektronik të çështjeve të përmbarimit.
