Ministria e Punëve të Brendshme reagoi pas akuzave të Partisë Demokratike se efektivi i policisë që bënte pazare për shitje kokaine u arratis si shumë drejtues të tjerë të uniformave blu.
Në një deklaratë për mediat, ministria e drejtuar nga Fatmir Xhafaj, sqaron të gjitha veprimet që u ndoqën menjëherë pasi rasti i denoncimit të efektivit të policisë Julian Balliu, u transmetua në emisionin investigativ “Fiks Fare”. Në deklaratë theksohet se ministria është e vendosur për të luftuar korrupsionin dhe paligjshmërinë në radhët e policisë së Shtetit, dhe një pjesë të rëndësishme në këtë proces, do ta ketë edhe zbatimi i vettingut.
Reagim i MB-së për deklaratën e PD-së:
Ministria e Brendshme, përmes Shërbimit për Çështjet e Brendshme dhe Ankesat (SHÇBA) dhe Policisë së Shtetit reaguan menjëherë mbrëmë pas publikimit të pamjeve në emisionin investigativ “Fiks Fare”, duke pezulluar dhe shpallur në kërkim oficerin e dyshuar si të implikuar në këtë vepër penale.
Hetimet e plota nisën menjëherë nga SHÇBA në bashkëpunim me Prokurorinë.
Ky është treguesi më i qartë se aktualisht në Policinë e Shtetit nuk ka më të paprekshëm, apo të mbrojtur në “çadrën” partiake, ashtu siç tregon vullnetin e qartë për pastrimin e radhëve nga çdo efektiv që shkel ligjin.
Ministria e Brendshme siguron qytetarët se, askush dhe për asnjë motiv, nuk do mund të ndryshojë vullnetin, për të luftuar krimin dhe goditur korrupsionin. Përpjekjet tona për konsolidimin e shtetit të së drejtës nuk do ndalen. Vetting-u në Policinë e Shtetit, i mbështetur fuqimisht nga partnerët ndërkombëtarë, është një mekanizëm ligjor që do ta përshpejtojë procesin. Vetting-u do të reformojë kapacitetet njerëzore në Policinë e Shtetit, duke promovuar pjesën më të shëndetshme, punonjësit më me integritet, të trajnuar, të mirë arsimuar, të cilët janë shumica në organizatë.
Duke përfituar nga rasti, i bëjmë thirrje PD-së të heqë dorë nga dhuna verbale ndaj Policisë së Shtetit, e të punojmë bashkë për ta bërë vendin dhe jetën e qytetarëve më të sigurt.
