Një teatër i zhveshur, ku poezia dhe muzika përballen, ngacmohen, harmonizohen dhe janë në duel me njëra-tjetrën. E tillë është shfaqja “Mall”, ku mund të përjetosh hedonizmin mistik të rubairave të Omar Khajamit, revoltën lirike të poetit Teki Dervishi, “Nuk ka libër të shenjtë që pluhuri s’e mbulon”, dromca humori të Charles Bukowski-t, por edhe meditimet ekzistenciale të Frederik Rreshpjes të shkrira me zërin e Marije Krajës, ëmbëlsinë e Hafsa Zyberit apo zjarrin e rapsodit Riza Bllaca.
Shfaqja ka si element kryesor poezinë, rrëfimin dhe muzikën dhe fillimisht është shfaqur në një festival në Francë. E krijuar prej rreth katër vitesh ajo ndryshon gjithmonë dhe tani në Tiranë, vjen e pasuruar edhe me tekste të Ernest Koliqit.
Asnjëherë nuk e luajmë njësoj këtë shfaqje. Gjithmonë e luajmë të rikompozuar, të rishpikur, të ndryshuar. Sigurisht rrotullohemi në një bosht narrative të njëjtë, por aksesorët skenografikë dhe disa nga pjesët performuese janë të ndryshme.”, – vëren Linda Rukaj.
Artistët, të cilët janë partnerë edhe në jetën personale, kanë shënuar me këtë shfaqje të parin bashkëpunim skenik me njëri-tjetrin.
“Është bashkëkrijuese, është e papritur, me ide të reja dhe kjo është një gjë që e dua jashtëzakonisht shumë.”, – shprehet Bajraktaraj për Linda Rukajn.
“Të luash përkrah me partnerin tënd shumë njerëz mund të thonë është e vështirë, por unë do të thoja është shumë e lehtë me Arbenin. Ai më ka dhënë diçka nga profesioni i tij, unë shpresoj t’i kem dhënë diçka nga profesioni im. Ne kënaqemi në skenë me njëri-tjetrin.”, – vijon Rukaj.
“Mall” do të vijojë të vihet edhe në Muzeun Etnografik në Kavajë dhe në Lekbibaj të Tropojës.
Nga ana tjetër, aktori Bajraktaraj sapo ka përfunduar xhirimet në një serial të Amazon, Prime Video me një studio hollivudiane. Ai sapo ka përfunduar edhe xhirimet të një filmi me metrazh të gjatë francez, ndërkohë që në gusht do të bëhet pjesë e një projekti në bashkëpunim me Qendrën Multimedia dhe autorin Jeton Neziraj.
