Mesditën e sotme Kryetari i Lëvizjes Vetëvendosjes Visar Ymeri në një konferencë për mediat bëri me dije dorëheqjen nga ky post, raporton AlpeNews.al.
Lëvizja VETËVENDOSJE!, vitin që lamë pas pati debate të brendshme mes funksionarëve dhe deputetëve, ccka mund të thuhet se zënkat ishin aq shumë të kursyera për mediat saqë nuk mund të mendohej se Brenda kësaj partie kishte problem.
Mesazhi i deputetes Aida Dërguti ku ofendon Albin Kurtin bëri xhiron në media, aq sa deputetja dha dorëheqjen. Por kjo nuk është një nga rastet tipike të shpërthimit. Edhe kryetari i VETËVENDOSJES, në një intervistë ku Visar Ymeri doli kundër Albin Kurtit, i cili ndodhej në burg, ai për herë të parë në publik flet për dallime.
“Problemi i vërtetë sipas mendimit tim, që po zgjat prej një kohe të gjatë tani në Lëvizjen Vetëvendosje, është një mospajtim thelbësor që kanë persona të ndryshëm brenda Vetëvendosjes, pra të strukturave drejtuese për atë sesi do të duhej që në të ardhmen ta kemi Vetëvendosjen si organizatë politike dhe cili është ai mekanizëm apo metodë që do ta siguronte demokracinë e brendshme në VV”, deklaroi kryetari aktual Visar Ymeri.
Përçarja vjen në momentin më të suksesshëm politik për Vetëvendosjen. Në zgjedhjet e fundit, kjo parti mori më shumë vota si forcë politike, sesa të gjitha partitë e tjera.
Brenda partisë ka nga ata, që thonë se e gjithë kjo bëhet për të penguar Albin Kurtin për të rikandiduar.
Liburn Aliu, anëtar i Kryesisë dhe deputet i Vetëvendosjes,tregon se situata nisi me kushtet që vendosi deputeti tjetër, Dardan Molliqaj.
“Ekziston një grup, ku Dardan Molliqaj pretendon që do të ndahet nga Lëvizja Vetëvendosje në rast se nuk plotësohen 4 pika, njëra prej të cilave ka qenë kandidimi i Albin Kurtit. Të thuhet që, për shkak se ekzistojnë dallimet në metoda organizative, e për shkak të këtyre dallimeve duhet të mos kandidojë zoti Kurti për kryetar, kjo është diçka që nuk ka të bëjë fare me Lëvizjen Vetëvendosje”, tha Liburn Aliu, anëtar i Kryesisë dhe deputet i VV.
Pas daljes së mesazhit që tregoi diferencat në parti, Aida Dërguti dha dorëheqjen si anëtare e Kryesisë. Në skenë doli hapur deputeti Dardan Molliqaj, që dha versionin e tij të situatës.
“Ajo çfarë kam parë nga zoti Kurti në këtë periudhë është një fundamentalizëm politik. Kjo nënkupton një kthim në rrënjët e Lëvizjes Vetëvendosje. Nëse në 2015-2016 është dashur të hedhim gaz lotsjellës në Kuvendin e Kosovës për të ndalur formimin e Zajednicës dhe miratimin e Demarkacionit, sot nuk kemi nevojë për demarkacion, sepse sot nuk ka shumicë prej 2/3-tave për ta miratuar. Kohët e fundit kemi nisur një diskutim për çështjen e bashkimit kombëtar, por mendoj se dallimi është mënyra sesi e shtrojmë bashkimin kombëtar. Unë shoh një shtim të folklorizmit në raport me bashkimin kombëtar”, thotë Dardan Molliqaj, deputet i VV-së.
Më poshtë keni letrën e plotë të dorëheqjes së Visar Ymeri
Të dashura aktiviste e aktivistë të Lëvizjes VETËVENDOSJE!
Të nderuar anëtarë të Këshillit të Përgjithshëm,
Që nga dita e sotme kam vendosur që të dorëhiqem parevokueshëm nga të gjitha pozitat e mia drejtuese në Lëvizjen VETËVENDOSJE!, nga pozita e Kryetarit të Lëvizjes, nga ajo e anëtarit të Kryesisë, si dhe nga pozita e anëtarit të Këshillit të Përgjithshëm të Lëvizjes. Më duhet ta them menjëherë që ky është një prej vendimeve më të vështira që kam marrë ndonjëherë në jetë.
Ka një kohë të gjatë, më shumë se një vit, që jemi duke u përballë me një problem me përmasa në rritje të cilin as nuk e dëshiroj e as nuk e përkrah. Për 11 vjet rresht jemi munduar e kemi kontribuar bashkërisht që ta ndërtojmë një organizatë politike që është plotësisht e ndryshme nga të gjitha subjektet tjera, si koncept e program politik, e rrjedhimisht edhe si mënyrë e të funksionuarit e të organizuarit. Në thelb të këtij organizimi politik i kemi pasur tri shtylla: Besnikëria ndaj konceptit politik, që e ka forcuar organizatën tonë dhe ia ka rritur asaj kohezionin; Besimi i ndërsjellë mes aktivistëve, i bazuar ky në vlerën fundamentale të barazisë mes nesh, edhe kur kemi qenë pashmangshmërisht në funksione të ndryshme brenda organizatës; Vetëmohimi, apo heqja dorë nga fokusi te uni në funksion të së mirës kolektive, në këtë rast brenda organizatës sonë. Duke dhënë çdo gjë në mundësinë tonë, secili p rej nesh, për pasurimin e përparimin e konceptit tonë politik, e duke hequr dorë, secili prej nesh, prej vetëprezervimit e vetërealizimit, kemi arritur këtu ku jemi, dhe kemi arritur të shihemi ndryshe prej të tjerëve: si të pakorruptueshëm, të sinqertë, të besueshëm.
Fatkeqësisht ky vit i fundit ka filluar t’i rrënojë themelet e këtyre 3 shtyllave të rëndësishme të organizatës sonë. Jemi përballur me një fushatë sistematike të shpifjeve, insinuatave, linçimeve e etiketimeve nga më të ndryshmet. Njerëzit janë quajtur abuzues e bashkëpunëtorë shërbimesh. Njerëzit që e kanë shpërndarë një propagandë të tillë vazhdimisht janë thirrur në emrin e Albinit. Disa herë jemi marrë vesh që këto gjëra të ndalohen, porse kjo nuk ka ndodhur kurrë. Këtë metodë nuk e pëlqej, nuk e mbështesë, sepse kjo e dëmton shumë organizatën tonë: metodën e eliminimit politik. Kjo metodë është e dëmshme sepse është informale. Është e padrejtë sepse bazohet në shpifje e insinuata. Është e panevojshme sepse Lëvizja i ka organet e veta edhe disiplinore edhe statutore të cilat kanë potencialin dhe vullnetin për ta mbrojtur secilin prej aktivistëve nga cenimi i integritetit, dhe për ta mbrojtur organizatën nga ata që duan ta dëmtojnë atë. Kjo mënyrë e funksionimit të organizatës është tejet e dëmshme dhe e rrezikshme. Si e tillë nuk na duhet. Sepse ajo e shkatërron besimin e ndërsjellë mes aktivistëve të cilin e kemi kultivuar për një kohë të gjatë. Kjo metodë e shkatërron kohezionin në organizatë. Pa këtë kohezion Lëvizja nuk rri e bashkuar. E kur nuk është e bashkuar Lëvizja nuk është e fortë. E kur nuk është e fortë humbim të gjithë. Jo vetëm ne, por e tërë Kosova.
Natyrisht që njerëzit e angazhuar edhe gabojnë. Dhe gabimet duhen vënë në pah dhe duhen trajtuar. Por të trajtohen si gabime. Në momentin kur gabimit i mveshet dyshimi për motivet, kur nuk ka kurrfarë arsye për një gjë të tillë, atëherë gabimi merr tjetër kuptim. Dhe trajtohet ndryshe. Dhe nuk gjen zgjidhje. Vetëm sjellë probleme të reja. Vetëm sa na largon nga njëri tjetri.
Ky problem, varësisht si e zgjidhim, mund të na bëjë shumë më të fortë. Por duhet ta zgjidhim. Dhe ta zgjidhim drejtë. Vetëm kështu zgjidhja e tij do të shërben si mësim e precedentë për të ardhmen. Nesë nuk e zgjidhim drejt atëherë problemi do të na instalohet si metodë e funksionimit organizativ tonit. Kjo do të na dëmtonte shumë. Organizata jonë duhet të jetë organizatë demokratike, e hapur, gjithëpërfshirëse, e qartë konceptualisht e ideologjikisht, me decentralizim të prodhimit intelektual e politik, me udhëheqje të ndershme, me vendimmarrje të hapur, e me vizion të qartë për të ardhmen.Ne duhet ta vazhdojmë rrugën e zhvillimit e të rritjes së organizatës sonë. Por jo secila rrugë na shpie atje. Lëvizja VETËVENDOSJE! përbëhet prej aktivistëve e anëtarëve që i bashkon koncepti e programi, ideologjia e praktika politike. Ne të gjithë bashkë i jemi besnik idesë. Jo njeriut. Një organizatë që ka besnikëri nda j njeriut e jo idesë, devijimin e ka prapa derës. Lëvizja nuk ka devijuar kurrë sepse nuk ka qenë organizatë e tillë. Dhe kështu duhet të mbetet.
Unë sot jap dorëheqje në shenjë mospajtimi me këto zhvillime. Por edhe si akt zhgënjimi që këto nuk kam arritur t’i ndalë. Kohëve të fundit kam parë një intensitet të shtuar të shpërfilljes së plotë të pozitës sime si kryetar dhe të organeve drejtuese të Lëvizjes sa herë që këto kanë marrë vendime që nuk kanë qenë në përputhje me vullnetin e një pjese të aktivistëve. Në këto rrethana është e pamundshme të drejtosh.E nëse nuk drejtoj atëherë nuk ka kuptim që të mbetem kryetar. Shpresoj që kjo dorëheqje e imja do të kuptohet si alarm për gjendjen në të cilën kemi ardhur dhe do të kuptohet drejtë nga të gjithë, e veçanërisht nga ata që kanë qenë të përfshirë në këtë fushatë linçimi e përdhosje ndaj njerëzve të caktuar, që të heqin dorë nga kjo metodë, që t’i tërrasin mendjes, e të mos e shkatërrojnë një organizim të tërë për teke personale.
Megjithatë ju falenderoj të gjithëve për punën e përbashkët. Gjatë këtij mandati sa kam qenë kryetar i Lëvizjes, jam shumë i lumtur që bashkë kemi arritur rezultate të paprecedentë jo vetëm për Lëvizjen por për historinë e vonë politike të Republikës. Jam shumë i lumtur që bashkë kemi arritur t’i ndalim Zajednicën e Demarkacionin me protesta e angazhim vetëmohues të të gjithëve e secilit. Këto protesta i kishim organizuar bashkë me AAK-në dhe Nisma-n. Jam po ashtu falenderues e i gëzuar për një proces të organizuar mirë të zgjedhjeve të brendshme, proces ky që e konsolidoi organizatën tonë, dhe e përgatiti atë për dy palë zgjedhje që u mbajtën në vitin 2017. Por mbi të gjitha jam jashtëzakonisht falenderues e i gëzuar për rezultatin në dy palë zgjedhjet e mbajtura vitin që sapo shkoi. Lëvizja jonë u dyfishua në këto zgjedhje. Kjo mendoj që më së miri e tregon forcën e kësaj Lëvizjeje. Rezultati zgjedhor është fryt i angazhimit të përbashkët e afatgjatë të të gjithë neve. Në asnjë mënyrë nuk duhet të lejojmë që ky rezultat të përvetësohet. Ai është rezultat i Lëvizjes, e është fitore e popullit. Kushdo që mendon ndryshe e ka gabim, dhe nuk e ka për qëllim të mirë.
Republika e Kosovës ka shumë nevojë për një subjekt politik që shëmbëllen integritetin, autonominë, ndershmërinë, demokracinë, sinqeritetin, vendosmërinë e qëndrueshmërinë që i duhet politikës. Këto janë parime të domosdoshme që mendoj se Lëvizja duhet t’i ndjekë. Por këto degradojnë atëherë nëse dhe kur individi e merr primatin përmbi të përgjithshmen, nëse dhe kur Lëvizja shndërrohet në zgjatim të vullnetit të një njeriu, nëse dhe kur Lëvizja mbetet peng i ambicieve personale. Instalimi i diktatit është problem në vetvete, por zakonisht nuk është qëllim në vetvete. Nëse mënyrë e të vepruarit politik në Lëvizje është diktati atëherë nuk ka koncept, parime e program, është veç fjala e një individi.
Përgatiti:AlpeNews.al