Pas gati katër vitesh pas nisjes së pushtimit të plotë rus në Ukrainë, pasojat e këtij gabimi strategjik janë të dukshme si për Moskën, ashtu edhe për Kievin.
Në mëngjesin e 24 shkurtit 2022, pak mendonin se Rusia do të fillonte një sulm në shkallë të plotë ndaj Ukrainës. Por Vladimir Putin vendosi ndryshe. Ushtria ruse, e cila kishte pasur sukses në Çeçeni, Siri, Gjeorgji dhe Krime, pritej të pushtonte Ukrainën brenda 10 ditësh.
Katër vite më vonë, kjo llogaritje doli shumë e gabuar. Lufta vazhdon, dhe humbjet njerëzore janë enorme, shkruan CNN.
Sipas Qendrës për Studime Strategjike dhe Ndërkombëtare (CSIS) në SHBA, rreth 1.2 milion rusë janë vrarë ose plagosur që nga fillimi i pushtimit. Nga këta, 325,000 rusë kanë humbur jetën, trefishi i humbjeve amerikane në të gjitha luftërat që nga Lufta e Dytë Botërore. Në Ukrainë, viktimat mendohet të jenë 500,000-600,000 njerëz.
Ministri i Mbrojtjes i Ukrainës, Mykhailo Fedorov, deklaroi se qëllimi është të ndalet ushtria ruse para se rekrutët e rinj të stërviten.
Edhe pse Rusia ka sfiduar parashikimet e perëndimit, ekonomia po ndjen efektet e luftës. Rritja e pagave dhe bonuset për ushtarët e rinj po shkakton mungesë punëtorësh në industri të tjera. Çmimet e ushqimeve, si kastravecët dhe domatet, janë rritur ndjeshëm, duke krijuar pakënaqësi tek qytetarët. Inflacioni dhe taksat e larta po rëndojnë jetën e përditshme në Moskë dhe qytete të tjera.
Pushtimi i Ukrainës nuk i ka dhënë Rusisë avantazhe ndërkombëtare. Suedia dhe Finlanda iu bashkuan NATO-s, duke rritur kufirin e aleancës me Rusinë. Sanksionet dhe izolimi politik e kanë detyruar Moskën të mbështetet tek Kina, duke e vendosur në një marrëdhënie të pabalancuar. Rusia nuk mundi të mbrojë aleatë si Siria, Irani dhe Venezuela, duke treguar dobësinë e ndikimit të saj global.
Katër vite pas nisjes së pushtimit, Rusia është e dobësuar brenda dhe jashtë vendit. Ky gabim strategjik ka shkaktuar një humbje të madhe njerëzore, probleme ekonomike dhe humbje të reputacionit ndërkombëtar.
Ndërsa lufta vazhdon, pasojat e këtij gabimi të madh do të ndihen për shumë vite.
