Ambasadorja në largim e BE-së në vendin tonë Romana Vlahutin është nderuar me titullin e qytetares së nderit në Vlorë.
Nderimi i është bërë asaj në një ceremoni të posatshme nga ana e kryebashkiakut Drital Leli, të cilin Vlahutin e ka vlerësuar për punën që ka bërë me qytetin.
Ambasadorja nuk është kursyer dhe me një histori personale të saj, teksa thotë që disa vite më parë ka humbur një varëse me perla, dhe e zëvendësoi atë me një varëse të re me shqiponjën.
‘’Kur përuruam shëtitoren e Vlorës më humbi një varëse me perla, isha shumë e trishtuar se e doja shumë atë varëse. Pastaj bëra një të re me shqiponjën, dhe kuptova që gjithçka ndodh për një arsye”, tha Vlahutin.
Vlahutini është pyetur nga gazetarët në lidhje me Reformën në Drejtësi, se në çfarë pike po e lë atë.
“Mendoj që e kam lënë në vijnë e moskthimit, kjo ka qenë një reformë kushtetuese, tani është një realitet. Ajo çfarë është bërë në pak vite në këtë vend, në vendet e tjera është dashur dekada.Ky është investim për të ardhme. Di të them që askush nuk mund të zhbëjë Reformën në Drejtësi.”
Më pas Vlahutin ka thënë se ndihet e trishtuar që po largohet por në të njëjtën kohë edhe e lumtur, pasi ka përmbushur misionin e saj këto 4 vite.
