Deputeti i CDU-së, Johann Wadephul në një intervistë për DW, pasi ka folur për negociatat, “po”-në e Gjermanisë, shoqëruar dhe me një “por” flet edhe për rastin e vëllait të ministrit të Brendshëm, Fatmir Xhafaj, i cili rezultoi të mos kishte kryer një dënim në Itali, ndërsa jetonte në Shqipëri.
Sipas tij, i takon qeverisë të vendosë për pozicionin e minsitrit Xhafaj, ndërkohë thotë që rastin e ka kritikuar fort edhe ambasadori i SHBA-ve, Donald Lu.
“Unë besoj se ministri i Brendshëm i Shqipërisë duhet të pyesë veten, nëse mund ta përmbushë detyrën plotësisht i pavarur. Vëllai i tij është ekspozuar ndaj akuzave. Dhe unë mendoj, se një person me një përgjegjësi të tillë duhet vetë të verifikojë, nëse mund ta kryejë detyrën i pavarur, nëse mund të drejtojë me përgjegjësi një proces në shtetin e së drejtës, kur ka akuza të forta, dhe kur vëllai i tij është përballur me procese në Itali. Qeveria duhet të vendosë vetë, nëse ai është personi i duhur që e vazhdon këtë detyrë. Unë kujtoj, se edhe ambasadori amerikan, që ka qenë mjaft miqësor ndaj qeverisë, në këtë rast ka ushtruar kritikë të fortë”,- shprehet Wadephul.
