Ministri i Punëve të Jashtme i Republikës së Turqisë, Mevlüt Çavuşoğlu, deklaroi sot në Bruksel se zhvendosja e ambasadës amerikane nga Tel Avivi në Jerusalem do të sjell kaos në Lindjen e Mesme, raporton Anadolu Agency (AA).
“Ky do të jetë gabim i madh. Në rajon në vend të paqes dhe stabilitetit do të sjell kaos. Qëndrimi i Turqisë është i qartë. Këtë hap nuk e kundërshton vetëm bota islame, por bota në tërësi. Këtë edhe më herët ia kam thënë sekretarit të shtetit të SHBA-ve, Tillerson, këtë do t’ia përsëris edhe në takimin e sotëm”, tha kryediplomati i Turqisë.
Më herët, zëvendës-kryeministri dhe zëdhënësi i Qeverisë së Turqisë, Bekir Bozdag deklaroi se njohja amerikane e Jerusalemit si kryeqytet të Izraelit do të ishte një katastrofë e vërtetë, raporton Anadolu Agency (AA).
“Njohja e Jerusalemit si kryeqytet do të shkatërronte procesin paqësor që zhvillohet me vështirësi të mëdha, do të hapte dyert e trazirave, krizave, kaosit dhe përleshjeve të mëdha, do të prodhonte negativitete të paparashikueshme. Me pak fjalë, njohja e Jerusalemit si kryeqytet për të gjithë ne do të ishte një katastrofë e madhe”, porositi Bozdag.
