I madh ky Ilir Meta. Në një intervistë për gazetën greke “Kathimerini” paska thënë:
“Në Shqipëri sot ka vetëm një konflikt madhor. Është konflikti mes kryeministrit dhe shtetit të së drejtës, demokracisë dhe pluralizmit politik.”
Me fjalë të tjera Meta e Kryemadhi, Berisha e Basha, në konfliktin me Edi Ramën:
– Përfaqësojnë shtetin e së drejtës, por duan vetëm pak… zhbërjen e reformës në drejtësi.
– Përfaqësojnë demokracinë por e duan atë pa demokraci. Por, duke djegur mandatet e deputetëve, duke dalë nga Parlamenti, duke sulmuar institucionet kushtetuese me molotovë dhe duke mos u futur në zgjedhje. Nuk e dinim që demokracia qenka simbol i lojës së rrugës!
– Përfaqësojnë pluralizmin politik por duan ta emërojnë vetë kundërshtarin politik. Meqë Edi Rama i mund, e duan pushtetin në tavolinë, sepse nuk e fitojnë dot me votë. Katërshja që del nga sistemi, qenka simbol i pluralizmit. Ndërsa ai që zbatoka rregullat e lojës pluraliste, qenka monist! Hajde logjikë hajde.
E ta mendosh që këto broçkulla Presidenti ynë në ikje, i ka thënë në një media ku e ka edhe origjinën, ideali demokratik i njerëzimit.
Në Greqinë e lashtë të epokës klasike (shek. V e IV p.e.s.) ku reformat e Solonit, Pisistratit dhe Klistenit lejuan përparimin dhe ngritjen e sistemit demokratik të cilat Efialti e Perikliu i perfeksionuan.
Siç shihet, Ilir Meta nëpërmjet intervistës që kishte habitur edhe gazetarin vetë, paska dhënë leksionin e gabuar, në kohën dhe në vendin e gabuar!