Një provokim i ri, i rrezikshëm nga Pheniani erdhi pasi Koreja e Veriut lëshoi një raketë balistike që fluturoi mbi Japoni të martën.
Kjo është hera e parë që ndodh që nga viti 2017.
Shtabi i Përgjithshëm ushtarak i Koresë së Jugut raportoi se koreano-veriorët lëshuan një raketë balistike me rreze të mesme veprimi, e cila fluturoi mbi pjesën lindore të arkipelagut japonez duke arritur një distancë prej 4500 kilometrash, përpara se të përfundonte në Oqeanin Paqësor.
Gjatë natës Tokio lëshoi një alarm ajror. Banorët e Hokkaido dhe Aomori u zgjuan nga sirenat dhe atyre iu kërkua të qëndronin brenda ndërtesave ose të shkonin në strehimoret më të afërta.
Operatori kryesor hekurudhor japonez ndaloi shërbimet e trenit të shpejtë Shinkansen në veri të arkipelagut si një masë paraprake. Një alarm u ngrit gjithashtu në hapësirën ajrore të prekur nga trajektorja e raketës.
Dënimi i kryeministrit japonez, Fumio Kishida, për veprimin ishte i menjëhershëm, duke e cilësuar lëshimin e raketës një “akt të egër”.
“Kam dhënë udhëzime për të kontrolluar për çdo dëmtim të mundshëm, për të mbledhur dhe analizuar informacione dhe për të bashkëpunuar me aleatët”, shtoi kreu i qeverisë në Japoni.
Sekretari kryesor i kabinetit dhe zëdhënësi i qeverisë japoneze, Hirokazu Matsuno, tha se “veprimet e Koresë së Veriut, duke përfshirë lëshimet e përsëritura të raketave balistike, kërcënojnë paqen dhe sigurinë e Japonisë , rajonit dhe komunitetit ndërkombëtar”.
Premtimi për një përgjigje “të fuqishme” ka ardhur nga Shtetet e Bashkuara. Ministri i Jashtëm japonez Yoshimasa Hayashi dhe sekretari amerikan i shtetit Antony Blinken folën në telefon pas lancimit te raketes, të cilin e quajtën “një kërcënim serioz dhe i pashmangshëm për sigurinë e Japonisë dhe një sfidë e qartë dhe serioze për komunitetin ndërkombëtar”.
Përshkallëzimi vjen në një kohë kur Japonia, Shtetet e Bashkuara dhe Koreja e Jugut po punojnë për të forcuar mbrojtjen e tyre në përgjigje të kërcënimit të paraqitur nga Pheniani.
Javën e kaluar të tre vendet kishin kryer stërvitje të përbashkëta detare për herë të parë që nga viti 2017.
Veprime që shihen nga udhëheqësi i Koresë së Veriut Kim Jong-un si provë se armiqtë e tij po përgatiten për luftë.
Programi raketor dhe bërthamor i Koresë së Veriut është i ndaluar nga Këshilli i Sigurimit i Kombeve të Bashkuara , i cili ka vendosur për sanksione të reja ndaj vendit.