Policia në qytetin Potsdam në Gjermani, afër kryeqytetit Berlin, e ka evakuuar një treg të Krishlindjeve pasi ka zbuluar një pako me gozhda dhe kabllo, e po ashtu, edhe një pajisje shperthyese.
Zyrtarët thanë se pakoja ishte çmontuar, por policia ende po zhvillon hetime për natyrën e kësaj pajisjeje. Gjatë këtyre veprimeve askush nuk ka pësuar ndonjë lëndim.
Policia në Potsdam ka shkruar në rrjetin Twitter se “një pajisje eksploduese jokonvencionale dhe e dyshuar, është konfirmuar”. Zyrtarë të shtetit Brandenburg i kanë thënë agjencisë dpa se kjo pajisje nuk do të kishte shkaktuar eksplodim, njofton REL.
Tregjet e Krishlindjeve në gjithë Gjermaninë, janë nën masa speciale të sigurisë, pasi vitin e kaluar, një shtetas i Tunizisë, me një kamion e ka sulmuar një treg të këtillë në Berlin, duke i vrarë 12 vetë dhe plagosur 56 të tjerë.