Rritet ndjeshëm numri i vjedhjeve në qytetin e Fierit. Mbi 20 raste janë regjistruar gjatë dy muajve të fundit, 6 prej të cilave vjedhje me mashtrim. Një shifër e konsiderueshme kjo, në raport me popullsinë e qarkut.
Të gjitha rastet janë dokumentuar nga Policia e Fierit dhe përfshijnë autorë të grupmoshave të ndryshme. Objekt i këtyre vjedhjeve kanë qenë farmaci dhe biznese të ndryshme në qytet. Sipas avokatit Ervis Goxhaj, faktorët kryesorë që i shtyjnë personat drejt kryerjes së këtyre veprave penale lidhen me kushtet e vështira ekonomike dhe papunësinë. Një pjesë e autorëve rezultojnë gjithashtu përdorues të lëndëve narkotike.
“Shumica e personave që kryejnë veprën penale të vjedhjes, parashikuar nga neni 134 i Kodit Penal, kanë probleme ekonomike dhe janë të papunë. Një pjesë e tyre janë përdorues të lëndëve narkotike dhe për shkak të varësisë shtyhen të kryejnë këto vepra për të siguruar të ardhura. Në rastet kur përdoret dhunë apo sende të forta, ligji parashikon dënime më të rënda”, shprehet avokati Ervis Goxhaj.
Përveç vjedhjeve të zakonshme, janë evidentuar edhe 6 raste të vjedhjes me mashtrim, forma më të sofistikuara të veprës penale, ku autorët përfitojnë shuma të konsiderueshme parash duke premtuar kryerjen e veprimeve juridike që në realitet nuk realizohen.
Shqetësues mbetet fakti se në disa raste autorët dyshohet të kenë qenë nën efektin e lëndëve narkotike në momentin e kryerjes së vjedhjes, çka rrit rrezikun për përdorim dhune dhe përbën kërcënim serioz për jetën dhe sigurinë e qytetarëve që bien pre e grabitjeve.
