Prokuroria e Elbasanit i është përgjigjur Partisë Demokratike lidhur me denoncimin për manipulim votash në fshatin Pekisht të Peqinit, gjatë zgjedhjeve të 11 majit 2025. Sipas PD-së, votat janë manipuluar përmes skemës së njohur si “treni bullgar”. Në përgjigjen zyrtare, Prokuroria bën me dije se është regjistruar procedimi penal nr. 522, datë 26.05.2025, për veprën penale “Falsifikimi i materialit zgjedhor dhe rezultateve të zgjedhjeve”, parashikuar nga neni 326 i Kodit Penal. Hetimet, sipas saj, janë në fazë verifikimi.
Skema “treni bullgar” funksionon përmes një metode të organizuar manipulimi. Persona të caktuar qëndrojnë jashtë qendrës së votimit me fletë votimi të paraplotësuara. Votuesit që pranojnë të shesin votën marrin fshehurazi fletën e plotësuar dhe hyjnë në qendrën e votimit. Aty kryejnë procedurat zyrtare, duke marrë fletën e vulosur nga komisioni. Në vend që ta plotësojnë, ata e marrin me vete dhe e dorëzojnë tek organizatorët jashtë, ndërsa në kuti hedhin fletën e plotësuar më parë. Më pas, kjo fletë zyrtare plotësohet nga manipuluesit dhe u jepet votuesve të radhës.
Ky fenomen është përdorur për herë të parë në Bullgari gjatë zgjedhjeve parlamentare të vitit 2009, ku u raportua se mes 200,000 dhe 350,000 votues, kryesisht nga komuniteti rom, morën pjesë në skemë. Në rastin e denoncuar në Shqipëri, PD thotë se kjo praktikë ka ndikuar drejtpërdrejt në rezultatin elektoral në Peqin, dhe kërkon hetim të thelluar nga autoritetet përkatëse.
