GJKKO ka komunikuar masat e sigurisë për disa persona të arrestuar pak ditë më parë dhe të dyshuar për vepra penale të rënda, përfshirë tjetërsim pronash dhe vrasje me paramendim, në kuadër të një operacioni të zhvilluar në zonën e Durrësit dhe Shijakut.
Gjykata caktoi masën “arrest në burg” për:
Vullnet Muçën, vëllai i Aleksandër Lahos, i njohur si “Rrumi i Shijakut”
Enea Kumen, vëllai i deputetit të PS-së, Loer Kume
Vlash Draçin (Brahja)
Astrit Avdylajn, i cili pritet të përballet edhe me akuza për vrasje për hakmarrje dhe drejtim të një grupi kriminal
Ermira Avdylin, masë ndalimi për të dalë jashtë shtetit
Për këtë çështje janë shpallur në kërkim disa persona të tjerë, përfshirë edhe Aleksandër Lahon (“Rrumin”), i konsideruar nga SPAK si drejtues dhe organizator i skemave kriminale të tjetërsimit dhe falsifikimit të dokumenteve pronësie.
Sipas Prokurorisë së Posaçme, grupi kriminal dyshohet se ka falsifikuar dokumente të pronësisë në zona si Lalëz, Shetaj dhe Bizë, me qëllim kalimin e pasurive në mënyrë të paligjshme në emra të tjerë.
Në lidhje me vrasjen e Edmir Bregut, ndodhur në vitin 2021 në Durrës, SPAK pretendon se porositës ishte Astrit Avdylaj, ndërsa në këtë krim rezulton i përfshirë edhe vëllai i deputetit të PS, aktualisht nën hetim.
