Komisioni Evropian ka deklaruar se nuk ka asnjë provë që Hamasi po devijon ose vjedh ndihmën humanitare në Gaza, duke e përshkruar gjendjen në territorin palestinez si “katastrofike” dhe urgjente për ndërhyrje ndërkombëtare.
Në një konferencë për media të mbajtur së fundmi, zëdhënësja e Komisionit Evropian, Eva Hrncirova, u shpreh se pavarësisht pretendimeve të ngritura kohët e fundit, BE-ja nuk ka marrë asnjë raport që të vërtetojë akuzat për përvetësim të ndihmës nga ana e Hamasit.
“Nuk kemi asnjë raport për Hamasin që vjedh ndihmën,” tha Hrncirova, duke theksuar se Bashkimi Evropian mbetet i përkushtuar ndaj parimeve të ndihmës humanitare të pavarur, neutrale dhe jo të politizuar.
Zyrtarja evropiane nënvizoi se infrastruktura e shpërndarjes së ndihmës ekziston, dhe duhet të përdoret menjëherë për të ndihmuar popullsinë civile që po përballet me uri ekstreme dhe mungesë kushtesh bazë për mbijetesë.
“Ne kemi një sistem funksional për ofrimin e ndihmës humanitare dhe duhet ta përdorim tani, pa vonesa,” theksoi ajo.
Komisioni Evropian deklaroi gjithashtu se nuk bashkëpunon me Fondacionin Humanitar të Gazës, një nismë e mbështetur nga SHBA-ja dhe Izraeli, që është bërë objekt kritikash të gjera nga organizatat ndërkombëtare për rolin e saj në shpërndarjen e ndihmës përmes ushtrisë izraelite.
“Ndihma humanitare nuk mund të privatizohet, politizohet apo të bëhet mjet konflikti,” tha Hrncirova.
Mbi 170 organizata ndërkombëtare, përfshirë Oxfam, Amnesty International dhe Mjekët pa Kufij (MSF), si dhe agjencia e OKB-së për refugjatët palestinezë (UNRWA), nënshkruan një deklaratë të përbashkët duke kërkuar ndalimin e shpërndarjes së ndihmës nëpërmjet ushtrisë izraelite dhe kthimin tek mekanizmat e koordinimit të udhëhequr nga OKB-ja.
Sipas OKB-së, që nga fillimi i ofensivës izraelite në tetor 2023, më shumë se 57,000 palestinezë janë vrarë në Gaza, shumica gra dhe fëmijë. Bombardimet e pandërprera dhe bllokada e ashpër kanë sjellë kushte të urisë masive, duke shkaktuar një nga krizat më të rënda humanitare të kohës moderne.
BE-ja vazhdon të mbështetet te organizatave ndërkombëtare të themeluara, si Kombet e Bashkuara dhe agjencitë e saj, për shpërndarjen e ndihmës në terren.
