Propozimi provokues i aktorëve italianë: “Nëse qeveria shqiptare mbyll teatrin kombëtar, skenografitë, skenën, poltronet do t’i marrim në Itali, në teatrin tonë, ku do të vendosim dhe flamurin shqiptar. Kështu historinë e teatrit shqiptar që qeveria kërkon ta fshijë do ta ruajmë ne në teatrin tonë.”
Artistët italianë të qytetit të Kazertas të shoqërisë teatrale “Compagnia della città e la Fabrica Ëojtyla” i janë bashkuar protestës së artistëve shqiptarë kundër prishjes së teatrit kombëtar.
Me një komunikatë për mediat artistët e kësaj shoqërie teatrale informojnë se do të udhëtojnë drejt Tiranës për të mbështetur protestën e artistëve shqiptarë.
“Nëse autorizohet mbyllja e Teatrit Kombëtar të Shqipërisë, artistët shqiptarë do të hyjnë në grevë urie, thuhet në deklaratën e aktorëve kazernitanë. E nëse qeveria shqiptare e marr këtë vendim për të fshirë historinë e teatrit kombëtar, atëherë këtë histori do ta ruajmë ne. Do të sjellim në Itali, poltronet, skenografitë, skenën e këtij teatri, në teatrin tonë ku do të vendosim dhe flamurin shqiptar.
“Një ndihmë e vogël për një çështje të madhe, në mbrojtje të kulturës; teatri.” deklarojnë artistët italianë të cilët pak kohë më parë kanë pasur një eksperiencë të paharrueshme në Teatrin Kombëtar të Tiranës.
