Presidenti i Kosovës Hashim Thaçi ka anuluar pjesëmarrjen e tij në Uashington, në takimin me Serbinë, të planifikuar më 27 qershor, pas ngritjes së akuzës nga Gjykata Speciale.
I dërguari i posaçëm i SHBA-së, Richard Grenell, ka bërë të ditur se megjithatë takimi do të mbahet, me pjesëmarrjen e kryeministrit Avdullah Hoti dhe presidentit serb, Aleksandar Vuçiç.
Zyra e prokurorit të specializuar ka ngritur një aktakuzë me dhjetë pika për shqyrtim, në të cilën presidenti i Kosovës, Hashim Thaçi, kryetari i Partisë Demokratike të Kosovës, Kadri Veseli, dhe të tjerë, akuzohen për një sërë krimesh kundër njerëzimit dhe krimesh lufte, ndër të cilat, vrasje e paligjshme, zhdukje e detyruar e personave, përndjekje dhe tortura.
Në një komunikatë për media, Zyra e prokurorit ka bërë të ditur se në aktakuzë pretendohet se Hashim Thaçi, Kadri Veseli dhe të dyshuar të tjerë janë përgjegjës për afërsisht 100 vrasje.
