Ende pa u mbushur 24 orë nga arrestimi që policia e Elbasanit i bëri Bledar Muçës, sikur raportoi Shqiptarja.com lidhur me aksidentimin e efektivit të burgut të Peqinit, Hekuran Pisha, ai është liruar nga ambientet e komisariatit. Vendimi është marrë nga prokuroria e Elbasanit, e cila nga verifikimi i dokumentacionit, konstatoi se i dëmtuari Hekuran Pisha, nuk ka dëmtime që kategorizohen si dëme të rënda, nga ku mund të plotësohen elementët e veprës penale të “Plagosjes së rëndë”. Nga ky aksident gardiani, ka marrë dëmtime të lehta dhe aktualisht ndodhet i shtruar në spital. Ndërsa ndaj tij është ngritur akuza e “Drejtimit të mjetit në gjendje të parregullt” dhe është marrë masa e “Detyrimit për t’u paraqitur në prokurori”.
Rezulton se Pisha drejtonte motorin pa patentë kur është përplasur nga automjeti që drejtohej prej Bledar Muçës. Muça është një emër jo pak i njohur për policinë e shtetit, pasi është arrestuar disa herë për ngjarje të rëndë dhe sërish është liruar nga gjykata. Muça është personi që u dënua me 2 vite burgim nga gjykata e Elbasanit për goditjen me armë të dy efektivëve të Grupit të Operacioneve Speciale në Policisë e Shtetit, goditje kjo që është kryer gjatë detyrës së tyre, teksa po mbanin në vëzhgim situatën në lagjen e Çapjave në Elbasan. Muça, është pjesë e këtij grupi në këtë qytet dhe konsiderohet si miku i familjes “Çapja”.