Mëngjesin e ditës së sotme është regjistruar një aksident i rëndë me pasojë vdekjen e dy personave. Aksidenti ka ndodhur në zonën e 21 Dhjetorit në Tiranë, ku janë përplasur fort dy makina.
Aksidenti ka ndodhur në një kryqëzim, dhe paraprakisht dyshohet se një prej mjeteve ka hyrë me semafor të kuq. Ndërkohë që siç shihet dhe nga pamjet, përplasja ka qenë tepër e fortë, aq sa mjetet janë shkatërruar plotësisht.
Dëshmitarë që ishin në vendin e ngjarjes, i thanë JOQ, se brenda një prej makinave që u përfshi në aksident është gjetur një armë zjarri tip AK47.
Nga ana tjetër kjo pistë nuk konfirmohet ende nga policia e Tiranës, që dha vetëm një informacion paraprak për këtë ngjarje të rëndë.
Personat që kanë vdekur si pasojë e përplasjes janë njëri nga shoferët i identifikuar si Luan Cenollari dhe pasagjeri, Ali Bejo, 69 vjeç.
Njoftimi i policisë:
Me datë 11.11.2021, rreth orës 03:20, në kryqëzimin “21 Dhjetori”, janë përfshirë në një aksident mjeti me drejtues shtetasin E. D., 30 vjeç dhe mjeti me drejtues shtetasin L. C.
Si pasojë e përplasjes ka ndërruar jetë drejtuesi i mjetit, shtetasi L. C., dhe njëri nga pasagjerët, shtetasi A. B., 69 vjeç.
Grupi hetimor ndodhet në vendngjarje për sqarimin e rrethanave të aksidentit.