Mbrëmjen e djeshme humbën jetën babai dhe dy fëmijët në aksident, ndërsa gruaja e tij dhe vajza janë të plagosur në gjendje të rëndë në spitalin e Shkodrës. Përpos tyre në spital ndodhen edhe dy persona, të cilët po udhëtonin në makinën me të cilën u përplas familja Preka.
Shkak i aksidentit nga të dhënat e para u raportua se ka qenë shpejtësia dhe mungesa e ndriçimit në rrugë, ndërsa gjithçka dyshohet se ka nisur nga parakalimi i gabuar i mjetit tip fuoristradë në të cilin po udhëtonin Sokol Mullaj 49 dhe Ndrek Gjergji 50-vjeç.
Në rrugën e plazhit në Velipojë, fuoristrada është futur në parakalim të gabuar, madje ka qenë me shpejtësi, ndërsa mungesa e ndriçimit ka bërë që të përplaset me ‘Alfa Romeon’ që po udhëtonte familja Preka. Megjithatë hetimet ende nuk kanë dalë në një rezultat përfundimtar për ngjarjen.
Nga aksidenti humbën jetën kryefamiljari Edmond Preka me dy fëmijët, djalin 9-muajsh dhe vajzën 5-vjeçe, ndërsa gruaja dhe vajza tjetër janë në spital. Vajza 10-vjeçe ndodhet në gjendje koma dhe mjekët japin pak shpresa, pasi ka dëmtime të rënda. Të plagosur, por jashtë rrezikut janë dy personat që ndodheshin në fuoristradë Sokol Mullaj dhe Ndrek Gjergji.
Viktimat
Edmond Preka-babai
Rajan Preka 9 muajsh-djali
Ajsel Preka 5-vjeçe-vajza
Të plagosur
Evisa Preka 36 vjeçe- gruaja
Noem Preka 10 vjeçe-vajza
Të plagosurit që ishin te makina tjetër
Sokol Mullaj, 49 vjeç.
Ndrek Gjergji, 50 vjeç.
