Një tragjedi e rëndë ka goditur komunitetin shqiptar në Greqi, pas një aksidenti fatal të ndodhur mbrëmjen e djeshme në Nea Peramos të Kavallës, ku kanë humbur jetën dy të rinj shqiptarë që ishin edhe miq të ngushtë.
Viktimat janë identifikuar si Ardit A., 34 vjeç, dhe Mariglen M., 36 vjeç. Ngjarja e rëndë ka ndodhur në aksin rrugor që lidh Nea Peramos me zonën e Ammolofoit, ku motori i drejtuar nga 34-vjeçari është förplasur fuqishëm me monopatinën elektrike me të cilën udhëtonte 36-vjeçari.
Si pasojë e përplasjes së fortë, Arditi ka ndërruar jetë menjëherë në vendngjarje për shkak të plagëve të marra. Ndërkohë, Marigleni është transportuar në gjendje kritike për jetën në Spitalin e Përgjithshëm të Kavallës, ku i është nënshtruar një ndërhyrjeje kirurgjikale me urgjencë, por pavarësisht përpjekjeve të mjekëve ka ndërruar jetë gjatë orëve të para të mëngjesit.
Lajmi për ndarjen nga jeta të dy miqve ka shkaktuar dhimbje të madhe te familjarët dhe komuniteti shqiptar atje. Autoritetet policore greke kanë nisur hetimet për zbardhjen e plotë të rrethanave dhe shkaqeve të këtij aksidenti tragjik. ERT News
