Një automjet i trupit diplomatik të vendeve arabe është përfshirë në një aksident rrugor të ndodhur në Shkozë pranë një karburanti mbrëmjen e sotme. Nga aksidenti ka mbetur e plagosur një grua, ndërsa “BalkanWeb”ka siguruar edhe pamje nga vendngjarja.
Automjeti tip ‘Benz’ me targa CD 4209 A i cili i përket ambasadës së vendeve arabe dhe ku udhëtonin dy shtetas të huaj është përplasur me një mjet me targa AA579Gt, ku udhëtonin dy bashkëshortë me banim në Shkozë.
Nga përplasja ka pësuar plagë në kokë shtetasja shqiptare që udhëtonte në automjetin tjetër e cila është dërguar me ambulancë për kontroll mjekësor në spitalin e Traumës.
Në vendngjarje kanë ardhur edhe persona të tjerë të ambasadës së huaj, ndërsa policia ka kryer hetime për të nxjerrë shkakun e aksidentit.
