Një aksident i rëndë ka ndodhur në orët e para të mëngjesit të sotëm në Fier, ku një person ka ndërruar jetë.
Mësohet se ngjarja ka ndodhur në aksin Fier-Seman rreth orës 02:00, ku viktima, një 50-vjeçar që lëvizte me motor, është përplasur nga një makinë. Ai ka marrë plagë të rënda dhe raportohet se ka ndërruar jetë në vendngjarje.
Ndërkohë, shoferi që shkaktoi aksidentin, një i ri 22-vjeçar, pas ngjarjes është larguar duke e lënë viktimën në rrugë. Policia po vijon punën për kapjen e tij dhe për zbardhjen e plotë të rrethanave të aksidentit.
Njoftimi i policisë:
Rreth orës 02:00, në aksin rrugor “Fier-Seman”, dyshohet se shtetasi A. G., 22 vjeç, duke drejtuar automjetin, ka përplasur motomjetin me drejtues shtetasin K. S., rreth 50 vjeç.
Si pasojë e përplasjes, shtetasi K. S. ka humbur jetën në vendngjarje.
Shërbimet e Policisë po punojnë për kapjen e drejtuesit të automjetit, shtetasit A. G., i cili është larguar nga vendi i aksidentit, me këmbë.
