Tre aksidente në Korçë, Vlorë dhe Durrës kanë ndodhur paraditen e sotme. Si pasojë dy persona kanë mbetur të plagosur.
Sipas informacioneve në kryqëzimin e fshatit Kamenicë në Korçë një mjet është përplasur me një motor, drejtuesi i këtij të fundit ka mbetur i plagosur.
“Më datë 12.06.2020, rreth orës 10:10, pranë kryqëzimit të fshatit Kamenicë, janë përfshirë në një aksident rrugor mjeti tip “Benz” me drejtues shtetasin A. R., me mjetin tip motor, drejtuesi i të cilit për pasojë është dëmtuar dhe u transportua për mjekim në Spitalin e Korçës”, thuhet në njoftimin e policisë së Korçës.
Ndërkohë në Vlorë një makinë ka përplasur një person me biçikletë në rrugën transballkanike. I aksidentuar është dërguar në spital dhe ndodhet në gjendje të rëndë.
Sakaq në Durrës, një 28-vjeçar i cili po drejtonte një makinë në gjendje të dehur gjatë manovrës për të kthyer mjetin e tij, ka goditur në pjesën e pasme automjetin e Policisë, i cili ishte i parkuar.
