Ministri i Financave, Arben Ahmetaj ka publikuar një draft vendim të qeverisë së kryeministrit Berisha, i cili parashikonte uljen e pragut në 2 milionë xhiro për biznesin e vogël që ai të deklaronte TVSH-në.
Në një konferencë për shtyp pak minuta para nisjes së protestës 60 minutëshe të biznesit të vogël, Ahmetaj tha se në këto 10 ditë qëkur ka nisur të aplikohet tarifa e TVSH-së për biznesin e vogël nuk është rritur asnjë çmim.
“Opozita kërkon të përdorë një masë anti-informalitet për të turbulluar ambientin politik shqiptar. Kjo masë do të provohet që këtë muaj se është masa e duhur. Ju ftoj të jepni një çmim të rritur në dyqanet e lagjeve, apo në supermarketet e mëdhenj që nga 1 prilli. Ajo që ne kemi thënë që nuk ka rritje çmimesh do jetë fakt në vazhdimësi përkundër inflacionit i cili do lëvizë në nivelet 1.6%-2.4%”, tha Ahmetaj.
Sipas tij “ata që dje gënjyen disa biznesmenë kanë qenë autorët e ndryshimit të pragut nga 8 në 5 milionë. Një VKM e 21.09.2009 i Sali Berishës uli pragun. Nuk po e komentoj fare nëse ka qenë e duhur apo jo e duhur. Ja ku është fakti ku vendimi i qeverisë është bërë nga ata që sot bëjnë sikur qajnë për biznesin e vogël, ata që sot tentojnë të gënjejnë një grup sipërmarrësish që janë të mençur për të kuptuar se cila është e vërteta. Kam edhe një draft vendim të Qeverisë së Berishës për ta bërë nga 5 milionë në 2 milionë. Ky draft është në protokollin e Ministrisë së Financave”.
