Pasi gjykata e Kurbinit por edhe ajo e Apelit në Tiranë la në fuqi masën e “Arrestit me burg” për Jeton Lamin, agjentin e forcave operacionale në policinë e shtetit, Gjykata e Lartë mbetet hallka e radhës e drejtësisë ku ai shpreson të fitojë lirinë.
Kërkesa për një masë më të butë sigurie e ish-truprojës së të shumkërkuarit Ervis Martinaj, pritet të shqyrtohet në dhomë këshillimi më 7 shkurt, nga relatori Sandër Simoni dhe gjyqtarët Ilir Panda e Sokol Binaj.
Lami i akuzuar për “Shpërdorim detyre” është personi kyç që mund të çojë në zbardhjen e misterit të të shumkërkuarit pasi nga hetimet rezulton që ai ta ketë shoqëruar ditët e para të gushtit të vitit të kaluar, para se 40 vjeçari të zhdukej dhe të denoncohej si i tillë nga familjarët.
Zyrtarisht Lami thuhet se nuk ka pranuar të bashkëpunojë me prokurorinë e Kurbinit për të treguar çfarë ai di mbi të kërkuarin e SPAK të cilin e shoqëronte ndonse për detyrë funksionale kishte ta vinte në pranga. Muajin e fundit banesa e Ervis Martinaj në Fushë Kuqe u kontrollua me urdhër të SPAK ku u gjetën një sasi armësh ndërsa në një banesë që i zhdukuri frekuentonte në Surrel të Tiranës nuk u gjetën sende të kundraligjshme.
Prej 9 muajsh Martinaj kërkohet nga SPAK për llogari të operacionit “Plumbi artë” ndërsa prej 6 muajsh është denoncuar i zhdukur nga familjarët të cilët dyshojnë se i ka ndodhur një gjë e keqe./
