Agjencia e njohur franceze ka publikuar një reportazh nga Shqipëria pas nisjes së hetimeve për ish-ministrin e Brendshëm, Saimir Tahiri.
Që në titullin e shkrimit thuhet se hetimet ndaj Tahirit i kanë dhënë një goditje shpresave të Shqipërisë për anëtarësim në BE.
“Një hetim ndaj ish-ministrit të Brendshëm shqiptar dhe lidhjeve të dyshuara të tij me trafikun ndërkombëtar të kanabisit, vjen në kohën më të papërshtatshme për vendin ballkanik, që kërkon të anëtarësohet në Bashkimin Europian. Vend kandidat që prej vitit 2014, Shqipëria synon që të bindë Brukselin që të hapë negociatat për anëtarësim në fillim të vitit që vjen. Por skandali ku përfshihet Saimir Tahiri, 38 vjeç, ministër i Brendshëm deri në mars dhe një aleat i ngushtë i socialistit Edi Rama, ka detyruar vendin që të mbrojë historinë me trafikun e drogës,” thuhet në shkrim.
Në shkrim citohet ambasadori amerikan në Tiranë, Donald Lu që ka deklaruar se Shqipëria ka një problem me lidhjen mes grupeve kriminale dhe politikanëve.
“Fjalimet e ambasadorit bien në kontrast me heshtjen e kujdesshme të ambasadave europiane, të cilat e kanë mbështetur Ramën që kur ai mori pushtetin në vitin 2013”, vijon shkrimi.
Sipas autorëve të shkrimit, Rama është më i dobësuar.
“Gjashtë muaj pas triumfit elektoral në zgjedhjet parlamentare, kryeministri duket i dobësuar. Skandali shpërtheu në mes të tetorit, pas arrestimit të një trafikanti shqiptar në Itali. Mediat lokale publikuan përgjimet telefonike ku duket se komprometohet edhe Tahiri”.
Në shkrim theksohet se për vite të tëra, Shqipëria ka qenë eksportuesi më i madh i kanabisit në Europë. Burimet diplomatike perëndimore përllogarisin se tregtia e kanabisit përbën një të tretën e Prodhimit të Brendshëm.
