Ish-drejtori i Autoritetit Rrugor Shqiptar, Dashamir Xhika, do të dalë ditën e sotme para Gjykatës së Krimeve të Rënda, për caktimin e masës së sigurisë. Ai është vënë nën akuzë për “shpërdorim detyre me tenderët e ndërtimit të rrugës Tiranë-Elbasan.
Së bashku me të, ditën e sotme, do të jenë në Gjykatë edhe dy ish-drejtuesit e menaxhimit të projektit të rrugës, Aksel Qurduka dhe Albens Alite, të arrestuar javën që shkoi. Dëmi për ndërtimin e rrugës Tiranë- Elbasan llogaritet 54 milionë dollarë nga një auditit i Ministrisë së Energjetikës, përfunduar në dhjetor të vitit të shkuar.
Prokuroria e Krimeve të Rënda ka kërkuar nga Gjykata “arrest me burg” për tre ish-zyrtarët. Auditi erdhi pas shirave të furishëm të dhjetorit, që shkaktuan shembje dhe bllokim në një pjesë të mirë të aksit.
Në vijim të konkluzioneve të këtij auditi, ministri i Infrastrukturës dhe Energjisë, Damian Gjiknuri, dërgoi pranë Prokurorisë për Krime të Rënda kallëzimin penal në ngarkim të Dashamir Xhikës, si edhe dy punonjësve të tjerë.
Procesi i auditit konstatoi efekte financiare me dëm ekonomik në vlerën 53,983,340 USD. Përveç kësaj, është konstatuar edhe një shkelje e disiplinës financiare në vlerën 16,117,926 dollarë, me ndryshimin e kontratave. Panorama/
