Aeroplanmbajtësja amerikane USS Lexington, e zhdukur gjatë Luftës së Dytë Botërore, është gjendur pranë brigjeve të Australisë pas plot 76 vitesh.
Anija humbi në betejën e detit te koraleve majin e 1942-shit. Gjatë luftimeve, asokohe u vranë më shumë se 200 anëtarë të ekuipazhit të saj, ndërsa u arrit të shpëtoheshin 2000 të tjerë.
Marina amerikane njoftoi tani se anija, për të cilën nuk dihej më asgjë prej gati 8 dekadash, u gjet në 3 km thellësi pas një kërkimi të kujdesshëm, të drejtuar nga bashkëthemeluesi i Microsoft, Paul Allen.
Pamjet filmike tregojnë se ajo ishte ruajtur mjaft mirë. Diktimi i USS Lexingtonit, së bashku me 11 nga 35 avionët e saj, u bë të dielën nga kompania e Allenit, “Vulcan”.
Kreu i komandës amerikane të paqësorit, Admirali Harry Harris, e përshëndeti zbulimin, e duke theksuar se është dhe vetë i biri i një të mbijetuari të “USS Lexington”, i përcolli urimet e tij Paul Allenit dhe ekuipazhit të ekspeditës kërkimore për lokalizimin e asaj që njihet ndryshe si “zonja Lex”.
Beteja e Detit të Koraleve konsiderohet si një moment kyç në ndalimin e përparimit të Japonisë në rajonin e paqësorit gjatë luftës.
