Vehip Peçi, nxënës i gjimnazit “Siri Shapllo”, i ka dhënë fund jetës duke u vetëvarur në banesë të dielën e Pashkëve (20 Prill, ora 13:30).
Ngjarja ka tronditur banorët e Valaresë, një fshat i vogël në periferi të qytetit të Gjirokastrës. Fqinjët e përshkruajnë Vehipin si djalë të sjellshëm me rezultate të mira në mësime.
“E njihnim ishte djalë i mençur dhe i shkathët. Problemi është tek telefonat që mbajnë fëmijët në duar”.“Është shumë e trishtë, djalë i mirë dhe familje e mirë. Më ka ardhur shume keq, s’më ka zënë gjumi natën”, – thanë fqinjët e familjes Peçi.
15-vjeçari jetonte me nënën dhe dy motrat e vogla përkatësisht 10 dhe 3 vjeç në një banesë dy katëshe, në kushte të mira ekonomike. I ati punon marinar në floten tregtare të Danimarkes dhe gjendej në lundrim në brigjet e Skocisë kur mori lajmin e kobshëm. Pritet të kthehet të martën për t’i dhënë lamtumurën djalit të vetëm.
Nga burimet mësohet se 15-vjeçari po kalonte një periudhë të vështirë psikologjike dhe kishte shfaqur shenja të izolimit, megjithatë nuk merrte trajtim mjekësor. Këtë akt të rëndë i riu mësohet se e kishte paralajmëruar kohë më parë duke u thënë shokëve të tij të klasës se do të shtegtonte tek Zoti, por shokët asnjëherë nuk i morën seriozisht fjalët e tij. Ndërsa në banesë janë gjetur disa shënime në anglisht, ku i kërkonte ndjesë prindërve, mësuesve dhe miqve për ikjen e tij.
Burimet thanë se hetuesit ka sekuestruar telefonin, shënimet e lëna nga i ndjeri dhe disa sende personale, ndërsa është marrë në pyetje punonjësja sociale, nëndrejtori i shkollës dhe disa shokë.
Një i afërm jashtë kameras tha se 15-vjeçari bullizohej në shkollë, por kjo nuk është një pistë e konfirmuar nga policia. Burimet thanë se po ndiqen disa pista, përfshirë edhe mundësinë e ndonjë ndikimi të jashtëm përmes rrjeteve sociale.
Shumë shqetësues për komunitetin është fakti se ngjarja vjen vetëm dy muaj pas vetëvrasjes së 17-vjeçares, Irsa Meçollari (më 10 shkurt 2025), nga e njëjta shkollë dhe në të njëjtën mënyrë “varje në litar”. Ka dyshime se dy ngjarjet mund të kenë shkaqe të përbashkëta por nuk ka ende prova, thanë burimet.
Asokohe u tha se Irsa bullizohej në shkollë, por Prokuroria e Gjirokastrës nuk arriti të zbulojë shkakun e vetëvrasjes, ndërsa hetimet janë ende në proces.
Zyra Arsimore e Gjirokastrës e mohon fenomenin e bullizimit në gjimnazin “Siri Shapllo”, ku u vetëflijuan dy nxënës brenda dy muajsh.
