Kryeministri Edi Rama përsërit shpesh në dëgjesat publike se zgjidhja e çdo shqetësimi të qytetarëve është portali “Shqipëria që duam.al”. Por qytetarët nuk marrin as zgjidhje dhe as përgjigje.
Kjo ndodhi edhe me rastin e ambulancës numër 8, drejtoresha e së cilës, Nevila Shtino, është emëruar pa asnjë kriter, pa eksperiencë pune dhe pa specializime. Ajo madje e ka kthyer edhe institucionin të tillë, duke rikthyer në punë një infermiere të dalë në pension, e duke mbajtur laborante pa arsim përkatës.
Ndërsa për laboranten Nexhmije Vellku thuhet se është diplomuar në Biokimi Klinike dhe ka mbaruar një specializim 5-vjeçar në Itali. Por kjo e fundit vulos përgjigjet e analizave, ndërkohë që këtë gjë duhet ta bëjë vetëm një mjek. Në vulën që shoqëronte analizat shkruhej Dr. Nexhmije Vellku, por pas denoncimit të qytetarëve në portalin “Shqipëria që duam.al” u zhduk emri nga vula.
Pas denoncimit të emisionit “Stop” mbrëmjen e së hënës, Ministria e Shëndetësisë ngriti një grup pune dhe shkuan për të verifikuar situatën në Poliklinikën numër 8.
Gjithashtu sot u transmetua një kamera e fshehtë në qendrën shëndetësore numër 8, ku shfaqet mungesa e mjekut pediatër ditën e dielë.
DIALOGU MES INFERMIERES DHE QYTETARES
Infermierja – Po?
Qytetarja – Si je? Si kalove? A ka pediatër sot?
Infermierja – Po, ja doktoresha!
Qytetarja – Si kaloni doktoresha?
Doktoresha – Mirë. Si je ti?
Qytetarja – Mirë, kam një fëmijë 3-muajsh, por vetëm të vjella ka. Nuk ka as temperaturë, as heqje barku. Ta sjell një herë ta shohësh?
Doktoresha – Po e ke vizituar te mjeku pediatër tamam?
Qytetarja – Jo, unë them… ia kam lënë vapës.
Doktoresha – Sille një herë!
Qytetarja – Deri në çfarë ore do të jesh këtu?
Doktoresha – Deri në 1:30, pastaj vjen mjeku tjetër. Ka deri në 8 të darkës mjek. Mirë?
Qytetarja – Në rregull!
Moderatorët e emisionit “Stop” u shprehën se janë në pritje të raportit të grupit të punës nga Ministria e Shëndetësisë për ta krahasuar me provat që posedojnë për abuzimin që është bërë në këtë qendër shëndetësore.
