Java e ardhshme mund të sjellë një takim mes presidentit rus Vladimir Putin dhe atij amerikan Donald Trump. Zëdhënësi i Kremlinit, Dimitri Peskov, deklaroi se mundësia e një takimi mes udhëheqësve po merret në konsideratë nga Moska. Të dy krerët e shteteve do të jenë në Vietnam javën e ardhshme, në kuadër të një samiti ekonomik.
Presidenti rus Vladimir Putin dhe homologu amerikan Donald Trump mund të takohen javën e ardhshme në samitin ekonomik të Azisë dhe Paqësorit që do të mbahet në Vietnam.
Zëdhënësi i Kremlinit, Dmitry Peskov deklaroi se Moska po merr në konsideratë organizimin e një takimi të tillë.
“Takimi vërtet po diskutohet. Është e vështirë të mbivlerësohet rëndësia e çdo kontakti mes presidentëve të Rusisë dhe Shteteve të Bashkuara për të gjitha çështjet ndërkombëtare,” u shpreh Peskov për gazetarët rusë, transmeton oranews.
Putin dhe Trump fillimisht u takuan në Samitin e G20 të organizuar në Hamburg në korrik, ku ata diskutuan mbi pretendimet për ndërhyrjen ruse në zgjedhjet presidenciale amerikane.
Sidoqoftë, që prej asaj kohe, marrëdhëniet mes Moskës dhe Uashingtonit janë tensionuar më tej.
Trump aprovoi sanksione të reja ndaj Rusisë në gusht, një lëvizje që Moska e interpretoi si dekurajuese për marrëdhënie më të mira mes palëve.
Putin, i tronditur nga sanksionet, urdhëroi që Uashingtoni të përgjysmonte stafin e ambasadës dhe konsullatës në Rusi.