Italia duket se po i afrohet gjithmonë e më shumë një zhvillimi historik: zgjedhjes për herë të parë të një presidenteje femër. Pas pesë ditësh ngërçi dhe votimesh të përsëritura, krerët partiakë janë detyruar të kërkojnë një zgjidhje kompromisi.
Dy janë kandidatet e forta në garë: Elisabetta Belloni, një diplomate karriere që drejton shërbimet e sigurimit, dhe ministrja e drejtësisë, Marta Cartabia.
“Unë po punoj që në krye të shtetit, të zgjidhet një grua e zgjuar”, u tha gazetarëve kreu i Ligës së krahut të djathtë, Matteo Salvini pas takimit që u zhvillua mes liderëve të dy partive kryesore të Partisë Demokratike të qendrës së majtë dhe Lëvizjes Pesë Yjet.
“Shpresoj që nesër të kemi një rezultat”, shtoi ai, i cituar nga Reuters. Giuseppe Conte, udhëheqësi i Pesë Yjeve, tha gjithashtu se ai dëshiron që gruaja të zëvendësojë presidentin në largim, Sergio Mattarella, mandati shtatëvjeçar i të cilit skadon javën e ardhshme.