“Ka ndodhur vjet. Isha shumë i frikësuar. Nuk isha në gjendje të flisja dhe as të shpjegoja situatën. Ndihesha sikur më mbyste diçka”.
Këto ishin fjalët e liderit të “U2”, duke u rrëfyer gjatë një interviste për “Rolling Stone”, që i ka dedikuar kopertinën e muajit janar të revistës.
Bono tha se rreth një vit më parë pati një eksperiencë, siç e përshkroi ai pranë vdekjes, por që nuk u ndal në detaje:
“Nuk e shndërrova dhembjen time në një telenovelë mediatike, siç bëjnë shumë personazhe të njohur”. Dhe pikërisht vdekja dhe vdekshmëria janë tema të rëndësishme në albumin e ri të “U2”, “Songs of Experience”, i katërmbëdhjeti i grupit rok irlandez, i dalë më 1 dhjetor.
Bono tha se ideja për të realizuar këngë që fokusohen te vdekja ishte edhe më parë dhe eksperienca e hidhur e tij i dha një shtysë më shumë krijimit të albumit.
“Kam pasur disa incidente shokuese në jetë, edhe një rrezik të keq nga biçikleta kohët e fundit. Njerëzit përjetojnë eksperienca të tilla që i afrohen vdekjes, që mund të jenë të natyrës psikologjike ose fizike. Për mua ishte fizike. Por, fatmirësisht ia dola mbanë dhe ua kurseva njerëzve atë pjesë telenovele që e bëjnë shumë të famshëm të tjerë”.
“Pata fat që kisha një reagim të shpejtë dhe mbështetje të plotë mjekësore, që shumë të tjerë mund mos ta kenë, edhe për probleme më të rënda se të miat. Nuk mendoja se do të kisha frikë se do të ikja kaq shpejt. Kam ende shumë albume për të bërë, të shoh fëmijët të rriten, të shijoj kohën me gruan time dhe me miqtë. Nuk duhej të më ndodhte mua, por ja që ndodhi. Fatmirësisht, jam ende këtu. Jam njeri me shumë fat”./city
