Byroja Federale e Hetimeve arrestoi të enjten Ghislaine Maxwell, ish- e dashura dhe bashkëpunëtorja e të akuzuarit për krime seksuale Jeffrey Epstein. Arrestimi u bë në Bradfor të shtetit Nju Hempshër.
Ndaj 58-vjeçares rëndon akuza se është përpjekur të joshë persona të mitur për t’u përfshirë në akte seksuale të paligjshme.
“Maxwell ishte ndër bashkëpunëtoret më të afërta të Epsteinit dhe ndihmoi që ai të shfrytëzonte vajza që ishin edhe të vogla se 14 vjeç”, tha prokurorja në detyrë e Manhatanit, Audrey Strauss.
“Maxwell luajti rol kritik në ndihmën që i dha Epsteinit për të identifikuar, afruar dhe përgatitur viktimat e vogla për abuzim.
Në disa raste, Maxwell mori pjesë vetë në abuzim,” tha ajo.
Maxwell mund të përballet me deri në burgim të përjetshëm, thanë disa ekspertë.
Maxwell kishte qendruar larg syve të publikut që nga vdekja e financierit Epstein, i cili u akuzua për përdhunim dhe trafikim të vajzave të mitura prej gati dy dekadash.
Disa nga viktimat e supozuara të financierit kanë thënë se Maxwell i kishte joshur ato në rrethin e tij, ku ishin abuzuar seksualisht nga ai dhe miq të tij të fuqishëm.
Maxwell aludohej se i sillte viktimat në shtëpinë lukzose të Epsteinit në Manhattan, por deri tani ndaj saj nuk ishin ngritur akuza penale.
Ajo është e bija e manjatit britanik të medias, Robert Maxwell, themelues i një shtëpie botuese dhe pronar i disa tabloidëve si Daily Mirror.
Pas vdekjes së tij misterioze në vitin 1991, doli se ai kishte vjedhur qindra miliona dollarë nga fondet e pensioneve të punonjësve për të mbajtur në këmbë perandorinë e tij mediatike, që ishte në rënie.
Në fillim të viteve 1990, Ghislaine Maxwell u zhvendos në Nju Jork, ku u mor me shitje pronash të patundshme.
Rreth kësaj kohe ajo nisi një marrëdhënie romantike me financierin Epstein, i cili bënte jetë luksoze dhe kishte mjaft njohje në sferat e larta.
Të dy ata kishin miqësi me figura të larta, si Bill Clinton, Donald Trump, Princi Andrew etj.
Pas akuzave ndaj Epstein, ky i fundit u gjet i vdekur në qelinë e tij.
Zyrtarisht thuhet se vrau veten, por ka pasur shumë dyshime se ata e vranë për të mos nxjerrë emrat e personave të rëndësishëm që kanë marrë pjesë në orgjitë me minorene.
Orgji në të cilat Maxwell kishte një rol të rëndësishëm pasi siguronte minorenet, të cilat i ftonte dhe i sillte ato në resortin e Epstein.
