Ditën e sotme shkrimtari dhe publicisti Rexhep Qosja feston 84 vjetorin e lindjes, ndërsa nuk mund të kishte dhuratë më të bukur për të se sa dalja në treg e romanit të tij më të fundit, i titulluar “Të fshehtat e treguara”.
Rexhep Qosja u lind në 25 qershor 1936 në Qifllak të Rahovecit, ndërsa është një nga shkrimtarët dhe akademikët shqiptarë më të vlerësuar, si dhe një anëtar i rregullt i Akademisë së Shkencave dhe Arteve të Kosovës.
Qosja është autor i mbi 50 librave me studime për letërsinë dhe kritikë letrare, prozë artistike, tregime, romane dhe drama, publicistikë e shkrime polemike.
“Ai është dhe mbetet njëri prej protagonistëve të realitetit të sotëm historik e kulturor shqiptar, figurë poliedrike e shkencëtarit, prozatorit, dramaturgut dhe kritikut letrar, eseistit dhe publicistit, mendimtarit dhe pedagogut, polemistit dhe intelektualit atdhetar e qytetar, që e ka lidhur jetën dhe krijimtarinë e tij me fatet e vendit dhe të kombit të tij, të kombit tonë një dhe të pandarë”, shkruan publicisti Fatmir Toci për akademikun Qosja.
Newsbomb.al i uron profesorit të nderuar jetë të gjatë e të shëndetshme.
