Prokuroria e Elbasanit ka regjistruar çështjen për atentatin e bërë mëngjesin e së hënës ndaj Ardjan Çapjas.
Organi i akuzës po kryen hetimet për “Vrasje me paramendim” e mbetur në tentativë dhe “Mbajtje pa leje të armëve luftarake”. “Është regjistruar çështja penale për veprat penale ‘Vrasja me paramendim’ e kryer në bashkëpunim, e mbetur në tentativë, e parashikuar nga nenet 78, 25 e 22 të Kodit Penal dhe ‘Mbajtja pa leje e armeve luftarake’, e parashikuar nga neni 278/1 i Kodit Penal. Vijon kryerja e veprimeve hetimore në bashkëpunim me Drejtorinë Vendore të Policisë Elbasan”, njoftoi Prokuroria lidhur me ngjarjen e ndodhur. Ndërkohë, për hetuesit shpresa më e fortë për zbardhjen e atentatit të dështuar mbeten kamerat e sigurisë.
LARGIMI I AUTORËVE
Sipas burimeve, mësohet se nga këqyrja e kamerave të sigurisë ka rezultuar se autorët janë larguar nga vendi i ngjarjes me një makinë tjetër tip “Volkswagen”. Automjeti është në ngjyrë blu të errët, ndërsa grupi hetimor ka dyshime se ka bërë transportin e autorëve të atentatit me snajper ndaj Ardjan Çapjas. Burimet thonë se itinerari i lëvizjes së autorëve pas krimit, sipas kamerave të sigurisë shkëputet në afërsi të zonës të njohur si Fushë-Mbret, ndaj ekspertët janë të pasigurt, por edhe mjaft të rezervuar për të shtuar të dhëna shtesë mbi këtë mjet, i cili mund ta çojë Policinë tek autorët e dyshuar.
Arma snajper e përdorur nga vrasësit për të eliminuar Ardjan Çapjan, burimet thonë se është e kalibrit 8.65 dhe përdoret vetëm nga profesionistë dhe jo qitës amatorë. Mes shumë pistave ku Policia po heton, dyshon se personi që hapi zjarr nga Krasta dhe kishte në shënjestër Ardjan Çapjan, mund të ketë qenë ish-ushtarak. Hetimet për zbardhjen e kësaj ngjarjeje janë fokusuar nga ana e Policisë te përplasjet e vjetra.
NGJARJA
Ka qenë ora 09:10 e së hënës, kur Ardjan Çapja ka dalë nga banesa e tij, në lagjen “Emin Matraxhiu”, por brenda perimetrit të oborrit është qëlluar me armë zjarri, duke mbetur i plagosur. Burime nga Policia thanë se për atentatin e radhës ndaj tij dyshohet se është përdorur një snajper dhe autori që ka kryer qitjen mund të ketë qenë në distancë të konsiderueshme nga objektivi. Çapja ka marrë një plagë të rëndë poshtë supit dhe është dërguar me urgjencë në Spitalin Rajonal të Elbasanit, por më pas është transportuar për në Spitalin e Traumës, ku i është nënshtruar një ndërhyrjeje kirurgjikale dhe është jashtë rrezikut për jetën.
Burime pranë vendit ku ndodhi ngjarja, shumë pranë banesës së 55- vjeçarit, thanë se në momentin që ai është plagosur janë dëgjuar të shtëna armësh që vinin nga një rreze e largët, por që nuk mund të përcaktohen dot. Të shtënat mund të kenë ardhur pas ngjarjes për të shpërqendruar Policinë, në mënyrë që të mos zbulohet vendi se nga ku është qëlluar. Autorët kanë pasur mjaft kohë që të largohen me një mjet të tipit “Volkswagen”, pasi kanë qëlluar nga largësia 55-vjeçarin Ardjan Çapja.
Dyshohet se atentati është kryer nga më shumë se tre persona, dy vëzhgonin dhe tjetri ka qëlluar dhe pasi kanë parë 55- vjeçarin, i cili është rrëzuar si pasojë e goditjes së plumbit, ata janë larguar nga vendi i ngjarjes. Por vetëm pak minuta pasi Policia mësoi për plagosjen, u lajmëruan se në një zonë të pyllëzuar në lagjen “Skënderbej” të Elbasanit po digjej një mjet. Menjëherë në vendin e ngjarjes ka shkuar Policia, efektivë të zjarrfikëseve, si dhe grupi hetimor që drejtohej nga prokurori.
