Maturantët në të gjithë Shqipërinë zhvillojnë ditën e nesërme provimin e parë të Maturës Shtetërore.
Mësohet se bëhet fjalë për provimin e gjuhëve të huaja, i cili do të jetë vetëm qarkime.
Ndërkohë ministrja e Arsimit Besa Shahini i ka uruar suksese të përzemërta, duke e cilësuar një sukses mbylljen e vitit shkollor pas situatës së krijuar nga tërmeti shkatërrues dhe pandemia vdekjeprurëse.
Postimi i plotë i Besa Shahinit:
Arritëm ta mbyllim këtë vit të vështirë shkollor, falë qëndrueshmërisë së nxënësve, durimit të prindërve dhe përkushtimit të jashtëzakonshëm të mësuesve tanë që brenda një kohë të shkurtër e përballën me sukses realitetin e krijuar nga tërmeti shkatërrues dhe pandemia vdekjeprurëse.
Mirënjohje të veçantë për secilin prej jush!
Tashmë jemi në atë “fazën finale të maratonës” për maturantët tanë, të cilët ditën e nesërme kanë provimin e parë të Maturës Shtetërore. Suksese të përzemërta secilit prej tyre në çdo provim dhe i dëshiroj gjithë të mirat në rrugëtimin e tyre jetësor.
