Kryeministri Rama i ftuar sot në studion e emisionit Opinion dha detaje rreth procesit të Reformës Zgjedhore.
Ai deklaroi se mazhoranca ka bërë të gjitha lëshimet e arsyeshme në këtë proces duke theksuar në mënyrë të veçantë identifikimin biometrik të aplikuar në të gjithë vendin.
“Topi është në fushën e PD dhe për sa na takon ne e kemi mbyllur këtë proces. Kemi bërë të gjitha koncesionet e arsyeshme. Le të themi që nëse do ti qëndronim strikt kornizës së rekomandimeve ne nuk duhet ta diskutonim përfshirjen e teknologjisë në zgjedhje sepse ODIHR nuk e ka rekomanduar. Për sa na takon, ne kemi bërë një studim me dëshirën për të adresuar këtë problem që alibia e teknologjisë të binte. Nuk është diçka e pabëshme për të bërë identifikimin biometrik. Votimi elektronik është përjashtuar kategorikisht. Një identifikim offline. Kjo është një gjë që kërkon kohë, unë jam pesimist. Kërkon sepse që nëse një vend shkon drejt teknologjisë të mos shkojë menjëherë por me faza. Ne donim që zgjedhjet në 2019 të shërbenin për të testuar sistemin. Problemi sot është koha.” – tha Rama.
Sa i përket diskutimeve në tryezën e Këshillit Politik, gazetari Robert Rakipllari deklaroi se ambasadori i Bashkimit Europian, Luigi Soreca ka marrë përsipër që BE të mbulojë anën financiare të aplikimit të sistemit të identifikimit biometrik. Këtë fakt e konfirmoi edhe kryeministri Rama.
“Debati është për administrimin zgjedhor. Është dakorduar për identifikimin biometrik dhe ambasadori i BE, Luigi Soreca e kam marrë përsipër që Bashkimi Europian të marrë kostot e identifikimit biometrik që shkon rreth 15 milionë euro.” – tha Rakipllari.
