Doni ta përvetësoni “alfabetin”, për të lexuar përtej rreshtave të deklaratave publike të liderëve politikë, të vërtetën që ata nuk do na e thonë kurrë? Është një zeje që mund të përvetësohet kollaj, përmes disa ushtrimeve praktike. Mjafton të kesh parasysh disa kode të thjeshta, sekretet e të cilave, gjenden në sjelljen e tyre politike 30 vjeçare.
Le ta shpjegojmë këtë përmes një shembulli të thjeshtë nga debati për reformën e re elektorale. Palët kishin rënë dakord me konsensus, me propozim të liderëve të opozitës, që ta përfundonin atë brenda 31majit. Jo vetëm që nuk u përmbush në kohë, por megjithë përpjekjet cfilitëse të ambasadorëve të SHBA, BE dhe Britanisë, ajo as nuk duket që të ketë shanse për tu arritur.
Pyetja që shtrohet pas kësaj është: Pse kjo qasje që nuk ka mendje perendimori që ta kuptojë? Sa do të zgjasi kjo situatë për një marrëveshje që nëse ka vullnet mund të mbyllet brenda një orë? Dhe kur pritet që të kemi më në fund “tym të bardhë” mbi çatinë e rezidencës Amerikane, që është bërë sëfundi, edhe selia e përpjekjes për arritjen e konsensusit mes palëve politike?
Për ti dhënë përgjigje këtyre pyetjeve, po e filloj me postimin e sotëm të Ilir Metës në facebookun e tij për këtë çështje ku shkruan: “Mesazhi i djeshëm i Bashkimit Europian është i qartë, zbatimi i kushteve fillon me konsensusin për reformën zgjedhore. 8 qershori po afron! Komisioni Europian mezi po pret të shënojë një lajm pozitiv për Shqipërinë!”
Po kush ishte mesazhi i BE që përmend Presidenti? Oliver Varhelyi, Komisioneri për Zgjerimin shkroi: “Reforma zgjedhore në Shqipëri: Unë i inkurajoj të gjitha palët, brenda dhe jashtë parlamentit, që të vazhdojnë akoma të provojnë dhe të arrijnë një marrëveshje. Kjo është një reformë e rëndësishme që duhet të ofrohet dhe do të ishte për të ardhur keq nëse humbet ky moment. Shpresoj për një marrëveshje: kjo është thelbësore”.
Çfarë pritet të ndodhi më 8 Qershor? Pasi Këshilli Europian miratoi më 24 mars hapjen e negociatave me Shqipërinë dhe Maqedoninë e Veriut, më 6 maj u zhvillua Samiti i Zagrebit BE- Ballkani Perendimor, ku u theksua mbështetja për integrimin e rajonit. Ndërkohë po punohet për detajet e fundit të dokumentave të rëndësishme, që do prezantohen më 8 Qershor në Bruksel, ku përcaktohet korniza në të cilën do të zhvillohen këto negociata të pranimit.
Një nga kushtet për Shqipërinë, është edhe zbatimi i reformës zgjedhore. Ndaj, gjetja e konsensusit për arritjen e marrëveshjes mes palëve politike në tryezën e Këshillit Politik për këtë reformë përpara 8 Qershorit, do të ishte një lajm shumë i mirë për Shqipërinë që do ta gëzonte edhe BE.
Pikërisht këtu qëndron edhe problemi. Kjo është edhe arësyeja se përse, atëherë kur u duk se opozita dhe mazhoranca ishin më pranë se kurrë për reformën zgjedhore, po shfaqen më larg se asnjëherë tjetër. Sepse opozita, marrëveshjen nuk e lexon si meritë të klasës politike dhe si arritje të Shqipërisë, por ka hallin e madh se ajo do të lexohet si një sukses i PS dhe Kryeministrit Edi Rama.
Pas kësaj, lexojeni edhe njëherë të plotë dhe me këtë sy postimin e Ilir Metës, për të kuptuar jo thjeshtë ironinë, por cinizmin e tij. Cinizmin e Kreut të Shtetit që e di shumë mirë se jo vetëm Petrit Vasili i LSI, por edhe Oerd Bylykbashi i PD, çdo gjë mund të bëjnë por kurrë nuk kanë për ta dhënë dakordësinë në emër të opozitës, për aq kohë sa është vetë Ilir Meta, Monika Kryemadhi, Lulzim Basha dhe Sali Berisha ata që nuk ua lejojnë atë.
E mbani mend besoj vitin e kaluar kur Presidenti i Republikës, deklaronte se “në mendjen time është vetëm një datë, 18 tetori 2019”. Ishte dita e provimit për çeljen e negociatave të BE me Shqipërinë, e që u bllokuan në fund në mënyrë të njanshme nga Franca, etj. Por përtej asaj deklarate publike, të gjithë e kujtojmë se e vetmja datë me firmën e Ilir Metës, mbeti çdekretimi i zgjedhjeve lokale të 30 qershorit.
Ndaj, mos u lodhni kot. Marrëveshje për reformën zgjedhore, deri më 8 qershor 2020 në Shqipëri do të ketë, aq sa kishte zgjedhje më 13 tetor 2019!
