Udhëtimi drejt Stacionit Ndërkombëtar të Hapësirës, i astronautëve të NASA-s në bordin e raketës Falcon 9, u shty për të shtunën për shkak të motit me stuhi dhe vetëtima.
Raketa pritej të nisej të mërkurën në orën 16:30 por moti i keq shoqëruar me shtrëngata gjatë pjesës më të madhe të ditës detyroi shtyrjen e lëshimit. Në fund u tha se në atmosferë kishte ngarkesë shumë të lartë elektrike, aq sa anija hapësinore me dy astronautët e NASA-s në bord, Doug Hurley dhe Bob Behnken, rrezikonte të goditej nga ndonjë rrufe.
“Sot nuk do të ketë asnjë lëshim, siguria e anëtarëve të ekuipazhit tonë është përparësia jonë kryesore“, njoftoi nëpërmjet twitterit administratori i NASA-s Jim Bridenstine.
Udhëtimi do t’i jepte fund një pauze nëntë vjeçare të NASA-s.
Raketa e kompanisë private SpaceX, në pronësi të miliarderit Elon Musk, pritej të lëshohej të mërkurën pasdite nga Qendra e Hapësirës Kennedy në Florida.
Presidenti Donald Trump dhe Zëvendës Presidenti Mike Pence shkuan në Cape Canaveral për të parë nisjen, ku lista e të ftuarve ishte mjaft e kufizuar, për shkak të pandemisë COVID-19.
Para nisjes, Elon Musk dhe Administratori i NASA-s Jim Bridenstine, me maska mbrojtëse në fytyrë ishin të pranishëm në ndërtesën e Qendrës Kennedy për t’u takuar me dy astronautët, të cilët nuk mbanin maska. Astronautët
pastaj dolën nga ndërtesa, përshëndetën me dorë anëtarët e familjes dhe
personat e tjerë dhe u futën në një makinë Tesla me të cilën shkuan në platformën e nisjes.
Astronautët e NASA-s, Koloneli i Marinsave në pension Doug Hurley dhe Koloneli i Forcave Ajrore Bob Behnken ishin gati për nisje, kur nga qendra erdhi urdhri për shtyrjen e fluturimit historik.
Që nga viti 2011, e vetmja mënyrë për të shkuar në stacionin hapësinor për astronautët ka qenë me raketa ruse të lëshuara nga Kazakistani.
Fluturimi i tyre që tani pritet të bëhet të shtunën do të shënonte rikthimin e nisjes së astronautëve nga Shtetet e Bashkuara, si dhe të parin e këtij lloji nga një kompani private.
/VOA
