Gazetari Ylli Rakipi thotë se mes Edi Ramës dhe Lulzim Bashës ka një marrëveshje të fshehtë që të ndërrojnë pushtetin me njëri-tjetrin.
Rakipi megjithatë tha në një emision televiziv, se opozita mund të qëndrojë përjetësisht në opozitë, pasi edhe aty Basha nuk është keq, “është njeriu i dytë më i rëndësishëm”, tha ai.
Pjesë nga deklarata e Rakipit:
Opozita, unë kam folur shpesh, pothuajse i kam thënë të gjitha. Fatos Lubonja thoshte sot që ka një marrëveshje mes Bashës dhe Ramës që të jenë bashkë dhe të qeverisin, të bie njëri dhe të vijë tjetri dhe ta shkëmbejnë pushtetin kështu. Lubonja nuk ishte duke thënë ndonjë gjë të re, por duke parë ngjarjet i zgjohen shqiptarëve këto.
Është më keq se kaq, duket se opozita është rehat aty ku është dhe mund të rrijë edhe përjetësisht në opozitë. Gjërat këtu në Shqipëri, të mirat publike, materiale, pra Edi Rama duket që është në vendin e vet, por edhe Basha është në vendin e vet, është njeriu i dytë më i rëndësishëm. Ai është rehat kështu, ka halle kryeministri, duhet të ngrihet shumë shpejt në mëngjes, duhet të punojë, të çajë kokën.
Këta e kanë bërë që në vitin 2008 me Kushtetutën, bënë Kushtetutën që të mos hyjë tjetër kush aty, por të ishte vetëm Sali Berisha me Edi Ramën. Ata e kanë marrë këtë vendim që në 2008. Por Edi Rama nuk e dorëzon pushtetin në tavolinë “hajde merre ti se u lodha”. Edi Rama thotë “jam unë këtu, kur të rrëzohem, hajde mere ti”.
Ne kemi mbërritur në këtë pikë që opozita shqiptare është kalçifikuar aq shumë sa është e vështirë të themi që kjo opozitë do të shkojë drejt pushtetit.
