Legjenda e Spanjës dhe Barcelonës, Xavi e ka krahasuar belgun Kevin de Bruyne me Lionel Messi, duke theksuar se ai ka ndikimin e njëjtë te Manchester Cityt sikurse ylli argjentinas te gjiganti katalunas.
Manchester City i Pep Guardiolas është duke e dominuar kampionatin në Ligën Premier, duke shkuar në 15 pikë para ndjekësit me të afërt dhe një rekord prej 18 fitoreve radhazi.
Meritor i kësaj ecurie pozitive padyshim se është edhe mesfushori belg, Kevin de Bruyne, i cili ka luajtur një rol kyç në organizimin e skuadrës, me gola dhe asistime.
“Ekipet e Pep fitojnë si skuadra, por edhe ekipet më të veçanta kanë nevojë për një lojtar që sheh mirë kur kanë nevojë për diçka të veçantë”, ka thënë fillimisht fituesi i Kupës së Botës për The Mirror.
“Në Barcelonë kemi pasur atë me Messin dhe në këtë ekip të Manchester Cityt e kanë atë me De Bruynen”.
“Jo çdo lojë ju mund të fitoni 3-0 ose 4-0, veçanërisht në Ligën e Kampionëve dhe kjo është kur keni nevojë për një moment shkëlqimi nga një lojtar i veçantë”, përfundoi Xavi.
