Blendi Klosi, ministër i Turizmit dhe Mjedisit në Shqipëri, ka thënë që kufiri i parë që synojnë të hapin është ai me Kosovën.
“Nëse do të ketë një kufi të parë që do të hapet, do të jetë kufiri me Kosovën. Besoj që qershori do na gjejë me kufijtë e hapur. Duhet ta pranojmë që nuk po jetojmë në një situatë normale”, ka deklaruar ai në Klan Kosova.
“Për ne do të ishte jashtëzakonisht e nevojshme, që do të kishte një hapje dypalëshe të kufirit, për sa i përket sektorit të turizimit dhe lëvizjes së lirë. Jemi një dhe kemi shumë karakteristika të përbashkëta”.
Megjithatë sipas Klosit, nuk duhet nxituar që të mos ketë gabime që do na kthejnë në situata të vështira me pandeminë.
“Ekspertët shëndetësorë do të marrin vendimet. E para është jeta e qytetarit, do të vazhdojmë ta theksojnë këtë”.
Klosi ka theksuar që pushimet duhet të bëhen nën respektimin e masave mbrojtëse.
“Sa i përket pushimit, padyshim është një mjet relaksi. Për Shqipërinë dhe Kosovën nuk është vetëm pjesa e relaksim por është një industri tërë që jeton me këtë biznes. Në Shqipëri ka rreth 95 mijë të punësuar direkt në sektorin e hotelerisë dhe turizmit”.
