Laj vazon me bikarbonat
Bikarbonati i zakonshëm ka aftësinë që të zhdukë bakteret, që ushqehen me limfën e kërcellit duke e ndotur ujin dhe duke e bërë të pajetueshëm për bimët. Që buqeta e freskët e luleve të qëndrojë për më shumë kohë e tillë, duhen pastruar muret e vazos me një sfungjer të ngjyer në bikarbonat pluhur. Për të vonuar sa më shumë zhvillimin e baktereve, para se të vendosësh lulet në vazo, shto pak bikarbonat edhe në ujë.
Përdor briskun
Lulet e këputura zgjasin më shumë nëse para se t’i vendosësh në vazo pret pak nga kërcelli. Por të përdorësh gërshërët mund të jetë një gabim: të dy tehet e gërshërës e dëmtojnë kërcellin nga forca që ushtrojnë. Dhe nëse uji nuk kalon në kurorë, petalet do të thahen. Më mirë përdor një thikë të mprehtë ose një brisk. Sa më e saktë të jetë prerja aq më pak dëme i shkaktohen kërcellit dhe kanaleve mikroskopike prej nga kalon uji.
Mbaje vazon larg frutave
Frutat e pjekura çlirojnë në ajër etilen, një gaz pa ngjyrë me aromë të ëmbël, që përshpejton proceset e maturimit të luleve. Dhe i than. Edhe lulet e thara çlirojnë të njëjtin gaz. Prandaj vazoja me lule duhet mbajtur larg shportës së frutave dhe duhen eliminuar lulet e thara.
