Organizata Freedom House thotë se Shqipëria shënoi një përkeqësim të standardeve demokratike gjatë vitit të kaluar, kryesisht për shkak të zhvillimit të zgjedhjeve njëpartiake për pushtetin vendor.
Menjëherë pas këtij raporti, kanë reaguar Ilir Meta dhe Lulzim Basha, të cilët kanë dhënë alarmin, se Shqipëria nuk është një vend demokratik.
Vetëm se harrojnë një gjë.
Raporti thotë se kjo rënie e Shqipërisë ka ardhur për shkak të zgjedhjeve të 30 qershorit, të cilat u bojkotuan nga opozita.
Ilir Meta dhe Lulzim Basha bënë çmos që të minonin demokracinë në Shqipëri, i pari duke anuluar zgjedhjet, në kundërshtim me Kushtetutën, ndërsa i dyti duke bojkotuar zgjedhjet, thjesht se nuk i pëlqente Rama si kryeministër.
Dhe tani dalin e flasin të shqetësuar për demokracinë në Shqipëri, kur vetë ata e kanë minuar dhe bojkotuar atë, për qëllimet e tyre të qarta për cilindo që jeton në Shqipëri.
Reagimi i Metës:
Thellësisht i shqetësuar nga konkluzionet e raportit të organizatës “Freedom House”.
Përkeqësimi i treguesve për nivelin e demokracisë, rënia ne qeverisje dhe proces zgjedhor kërkon një reflektim dhe përgjigje nga të gjithë.
Konkluzioni në raport se: “Nga Tirana në Tbilisi, ata që janë në pushtet, nuk janë të interesuar që ta bëjnë parlamentin një vend ku diskutohet” është një këmbanë e fortë alarmi.
Është koha për një ringritje të menjëhershme dhe për një trajektore të re të demokracisë, shtetit ligjor dhe respektimit të të drejtave të njeriut, me qëllim përmbushjen sa më parë të kushteve të vendosura nga Bashkimi Europian, me qëllim integrimin e plotë të vendit pa zvarritje të mëtejshme.
Reagimi i Bashës:
Bashkë me maskat e skaduara të qeverisë, ka rënë edhe maska e skaduar e demokracisë fasadë në Shqipëri. Freedom House arrin në këtë konkluzion në raportin e saj të fundit që tregon se vendi ynë ka berë hapa prapa ne nivelin e demokracisë në vend: rënie në fushën e qeverisjes demokratike dhe procesit zgjedhor, vlerësim negativ për pavarësinë e gjyqësorit dhe për lirinë e mediave. Gjithashtu, ishte zhbërja e institucionit të parlamentit nga qeveria dhe maxhoranca që e detyruan opozitën të largohet nga institucioni.
Të gjithë e shikojmë sot në kohën e pandemisë dhe krizës ekonomike sa të vërteta janë këto raporte ndërkombëtare për dështimet e qeverisë. Sepse institucionet e shtetit shqiptar nuk punojnë më për njerëzit, ato punojnë për një grup në pushtet që vjedh pasuritë publike, që gënjen dhe mashtron, dhe që i braktisi njerëzit gjatë pandemisë kur ata kishin më shumë nevojë se kurre për shtetin.
Ne duhet t’ua kthejmë institucionet njerëzve, t’ua kthejmë qeverisjen e përgjegjshme njerëzve dhe të rivendosim standartet demokratike në vend. Shqipëria ka potencial të jashtëzakonshëm! #ditemetemira
