Zbardhet emri i shtetasit nga Kosova, i cili është shpallur në kërkim për laboratorin e drogës të ndërtuar brenda në banesës e familjes Kapaj në Mbrostar të Fierit. Ai është Brahim Faredini, i cili mësohet se ka financuar këtë laborator droge të zbuluar tre ditë. Në këtë laborator, policia sekuestroi një kartë identiteti të Republikës së Serbisë, me emrin dhe foton e personit të shpallur në kërkim Brahim Faredini.
Bashkë me Faredinin, policia e Fierit rezulton të ketë shpallur në kërkim dhe pronarin e shtëpisë Aleksandër Kapaj. Nga verifikimet e kryera rezulton se Aleksandër Kapaj, është një personazh jo i panjohur për drejtësinë Shqiptare.
Kjo pasi në 27 korrik 2008, Kapaj është deklaruar fajtor dhe dënuar për trafik droge nga Gjykata për Krime të Rënda. Dënimi i tij është në masën e 6 vjet e 8 muaj burgim. Ndërkohë djali i Aleksandrit, i arrestuari Anxhelo Kapaj, është deportuar nga Franca në vitin 2019, kjo pasi në këtë shtet ai ishte dënuar me 2 vite burgim për akuzën e shpërndarjes dhe shitjes së lëndëve narkotike.
Momentalisht Anxhelo Kapaj ndodhet në burg nga gjykata e Fierit, ndërsa për të ëmën e tij Qamile Kapaj u vendos ‘arrest shtëpie’.
Të vetmit persona që janë shpallur në kërkim është kosovari Brahim Faredini dhe kreu i familjes Aleksandër Kapaj.
Qamile Kapaj është shfaqur e penduar dhe ka kërkuar falje përpara togave të zeza, teksa ka pranuar krimin. Ajo është shprehur në gjykatë se e gjitha ka ardhur si pasojë e kushteve shumë të vështira ekonomike pasi kishte një borxh prej 25 milion lekësh tek të afërmit e tyre.
